უკრაინა, კურსკის ოლქში სამხედრო ოპერაციის ჩატარების გეგმას დასავლელი მოკავშირეებისგან საიდუმლოდ ამზადებდა — ამის შესახებ ინფორმაციას The Economist ავრცელებს.

უცხოური მედია ინფორმაციას, უკრაინის შეიარაღებული ძალების მთავარსარდალ ალექსანდრ სირსკის მიერ გავრცელებულ განცხადებაზე დაყრდნობით წერს.

"საიდუმლოდ ინახავდა გენერალი სირსკი თავის გეგმებს და მათ მხოლოდ გენერლებისა და უშიშროების ჩინოვნიკების ვიწრო ჯგუფს უზიარებდა. ის პრეზიდენტს პირადად, მრჩევლების გარეშე ესაუბრა. დაზვერვის დიდ ნაწილს არმიის დაზვერვა ახორციელებდა, ნაცვლად იმისა, რომ ეს მთავარი სადაზვერვო სამმართველოსთვის მიენდო, უკრაინის სამხედრო დაზვერვა პროცესში მხოლოდ გვიან ეტაპზე ჩაერთო" — წერს გამოცემა.

მედიის ცნობით, უკრაინის მოკავშირეებს ასევე შეგნებულად არ აცნობეს გეგმების შესახებ, რადგან დასავლეთმა უკვე ჩაშალა სირსკის წინა ოპერაცია — ერთის შესახებ რუსეთმა შეიტყო, მეორეს გაუქმება კი დასავლეთმა მოითხოვა (თუ რა ოპერაციებზეა საუბარი, სტატიაში არ წერია). ახლა კი, როდესაც დასავლეთი ფაქტის წინაშე დადგა, მას აღარ შეეწინააღმდეგა.

გამოცემის ცნობით, კურსკის რეგიონში ოპერაციის მომზადებისას, უკრაინის სამხედრო ხელმძღვანელობამ განიხილა რამდენიმე ვარიანტი, კერძოდ: დარტყმა ბრიანსკის ოლქში, კომბინირებული დარტყმა ერთდროულად ორ რეგიონში, დარტყმა კურსკის რეგიონში, ან კიდევ უფრო დიდი მასშტაბით.

ასევე წერია, რომ ოპერაციის მთავარი მიზანი იყო დონბასიდან რუსული ჯარების გაყვანა და მომავალი მოლაპარაკებებისთვის უპირატესობების შექმნა.

The Economist-ს თავად სამხედროებმა განუცხადეს, რომ მათ ეჭვი აგვისტოს დასაწყისში გაუჩნდათ, რომ რაღაც სერიოზული მზადდებოდა, როდესაც მათ მოულოდნელად დაურიგეს აღჭურვილობა: ახალი ჩაფხუტები ინტეგრირებული ყურსასმენებით, ასევე ახალი შაშხანები. ჩაატარეს წვრთნები მაკეტებზე, რომლებიც როგორც მოგვიანებით გაირკვა რუსული სოფლები იყო.