18 აგვისტოს ვლადიმირ პუტინი სახელმწიფო ვიზიტით აზერბაიჯანში ჩავიდა.

რუსეთის პრეზიდენტს აეროპორტში აზერბაიჯანის პრემიერმინისტრის მოადგილე იაკუბ ეიუბოვი დახვდა. მოგვიანებით პუტინი პრეზიდენტ ილჰამ ალიევს რეზიდენციაში შეხვდა.

ამ დროისთვის ორი ქვეყნის პრეზიდენტს ერთობლივი განცხადება არ გაუკეთებია. კრემლის ინფორმაციით ლიდერები აზერბაიჯანისა და რუსეთის სტრატეგიულ ურთიერთობებზე ილაპარაკებენ.

"ლიდერები რუსეთ-აზერბაიჯანის სტრატეგიული პარტნიორობის სამომავლო განვითარებაზე იმსჯელებენ" — წერია კრემლის ოფიციალურ საიტზე.

გარდა ამისა, მედიაში წერენ, რომ პრეზიდენტებმა შესაძლოა აზერბაიჯანსა და სომხეთს შორის დაწყებული მშვიდობიანი პროცესის დეტალებზეც ისაუბრონ. ასევე, დიდი ალბათობით ლიდერები ეკონომიკური თანამშრომლობის, კერძოდ გაზისა და ნავთობის იმპორტ/ექსპორტის საკითხებზე იმსჯელებენ.

რუსეთის პრეზიდენტის ვიზიტი აზერბაიჯანში 19 აგვისტოს დასრულდება. უკანასკნელად პუტინი აზერბაიჯანში 2018 წელს იყო ჩასული. 2024 წლის აპრილში ალიევი მოსკოვს სტუმრობდა.