დღეს, 22 ივლისს, საქალაქო სასამართლოში, მოსამართლე კობა ჩაგუნავამ დაადგინა, რომ ლუკა კინწურაშვილის საქმეზე, პოლიციელის მოთხოვნისადმი დაუმორჩილებლობას ადგილი არ ჰქონია.

მოსამართლემ კინწურაშვილის სიტყვიერი შენიშვნა მისცა იმის გამო, რომ სამართალდამცველს თავხედი უწოდა.

პოლიცია კინწურაშვილს ადმინისტრაციულ სამართალდარღვევათა კოდექსის 173-ე მუხლის დარღვევას ედავებოდა, რაც პოლიციელის მოთხოვნის დაუმორჩილებლობას გულისხმობს. თუმცა, მოსამართლემ დაადგინა, რომ 173-ე მუხლის დარღვევას ადგილი არ ჰქონია.

9 ივლისს, მოქალაქე ლუკა კინწურაშვილმა ფეისბუქზე დაწერა, რომ სამართალდამცავებმა ქუჩაში უმიზეზოდ გააჩერეს, უხეშად ესაუბრებოდნენ, შემდეგ კი დააკავეს და არც ადვოკატთან დაკავშირების საშუალება მისცეს.

კინწურაშვილმა დროებითი მოთავსების იზოლატორში ორი დღე გაატარა.