ანჯელინა ჯოლისა და ბრედ პიტის 18 წლის შვილმა, შაილომ, მამის გვარი ოფიციალურად მოიშორა. მისი ადვოკატის თქმით, ეს გადაწყვეტილება შაილომ მის ცხოვრებაში მომხდარი "მტკივნეული მოვლენების" გამო მიიღო.

შაილო 18 წლის მაისში გახდა და გვარის ცვლილების შესახებ ლოს ანჯელესის სასამართლოში მაისშივე შეიტანა განაცხადი. მისი მოთხოვნა ივლისში დაკმაყოფილდა — შაილო ნუველ ჯოლი-პიტი ახლა უკვე შაილო ნუველ ჯოლია.

შაილო ჯოლი

ფოტო: Getty Images

როგორც ჩანს, შაილოს მსგავსად მოქცევას აპირებს მისი დაც, ვივიენი. 16 წლის ვივიენმა წელს ანჯელინა ჯოლისთან ერთად ბროდვეის მიუზიკლის, The Outsiders-ის შექმნაში მიიღო მონაწილეობა და მოითხოვა, რომ აფიშაზე მისი სახელი ვივიენ ჯოლი-პიტის ნაცვლად ვივიენ ჯოლიდ მოეხსენებინათ.

ასე მოიქცა 19 წლის ზაჰარა ჯოლი-პიტიც, რომელმაც გასულ ნოემბერში შპელმანის კოლეჯში საკუთარი თავის წარდგენისას მამის გვარი არ გააჟღერა, თუმცა, ოფიციალურ დოკუმენტებში ჯერჯერობით ორივე მშობლის გვარით მოიხსენება.

ბრედ პიტთან დაახლოებული ანონიმური პირის ინფორმაციით, "6 შვილის მამა განიცდის ამ სიახლეს და სურს, რომ შვილებთან არსებული ადრინდელი სიახლოვე დაიბრუნოს."

ანჯელინა ჯოლი შვილებთან ერთად

ფოტო: Getty Images

ანჯელინა ჯოლი და ბრედ პიტი ერთმანეთს 2016 წელს დაშორდნენ. წყვილის სასამართლო დავა ჯერ კიდევ გრძელდება.