ტეილორ სვიფტის ფანების მრავალმილიონიან არმიას გერმანული ქალაქი გელზენკირხენიც შეუერთდა; უფრო სწორად — ამიერიდან უკვე სვიფტკირხენი. ჰო, ქალაქმა, არც მეტი, არც ნაკლები, სახელი შეიცვალა ამერიკელი პოპვარსკვლავის დასახვედრად. თუ იმასაც გავითვალისწინებთ, რომ სვიფტკირხენი სიტყვასიტყვით "სვიფტის ეკლესიად" ითარგმნება, დარწმუნებით შეგვიძლია ვთქვათ: ეს ქალაქი სულ მალე მუსიკოსის ყველაზე გულმხურვალე ფანებს გააერთიანებს...

ტეილორ სვიფტის მასშტაბური მსოფლიო ტურნეს კონცერტები სვიფტკირხენში 17, 18 და 19 ივლისს გაიმართება ფელტინს-არენაზე, რომელიც 70 ათასს მაყურებელს იტევს. ამ მნიშვნელოვანი მოვლენის აღსანიშნად ქალაქისთვის სახელწოდების შეცვლის იდეა სვიფტის გერმანელ ფანს, ალეშანეე ვესტჰოფს, ეკუთვნის. ვესტჰოფმა წინადადებით ქალაქის მერს, კარინ ველგეს, რამდენიმე კვირის წინ მიმართა. დიდებული იდეააო, უპასუხა ველგემ ალეშანეეს და ქალაქის ახალი სახელის აღმნიშვნელი აბრის გახსნაზეც მიიწვია.

ალეშანეე (მარჯვნივ) და ყოფილი გელზენკირხენის ახალი აბრა

ფოტო: GGelsenkirchen / X

ყოფილ გელზენკირხენში კი კონცერტებისთვის მზადება გრძელდება. უახლოეს დღეებში ქალაქის ქუჩებში გამოჩნდება ყველაზე პოპულარული ღირსშესანიშნაობების აღმნიშვნელი ბანერები და ტრამვაი ტეილორ სვიფტის გამოსახულებით. ამასთან, სვიფტს ვარსკვლავს გაუხსნიან გელზენკირხენის დიდების ხეივანშიც, კონცერტების პერიოდში კი ღია ცის ქვეშ გაიმართება მასშტაბური კარაოკე წვეულებები. ქალაქის ხელისუფლება პოპვარსკვლავის ფანებს სხვა სიურპრიზებსაც ჰპირდება.

ფოტო: Ethan Miller / TAS23 / Getty Images

სვიფტის რიგით მეექვსე ტურნე, The Eras Tour, შარშან მარტში დაიწყო და მიმდინარე წლის ბოლომდე გასტანს. იმის მიუხედავად, რომ ჯერ არც კი დასრულებულა, ის ისტორიაში უკვე ყველაზე მაღალშემოსავლიანი ტურნეა; ამასთან, ისტორიაში პირველი, რომლის შემოსავალმა $1 მილიარდს გადააჭარბა. დიდი კომერციული წარმატება ხვდა წილად ტურნეზე გადაღებულ დოკუმენტურ ფილმსაც, რომლის შემოსავალმა $260 მილიონზე მეტი შეადგინა.

ბოლო ერთი წელი სვიფტისთვის ნამდვილად კარიერის პიკი აღმოჩნდა: მუსიკოსმა გამოუშვა ორი განახლებული ალბომი, წამოიწყო უპრეცედენტო მასშტაბის საკონცერტო ტურნე და რეკორდი რეკორდზე მოხსნა. მაგალითად, სვიფტი Spotify-ზე პირველი ქალი მუსიკოსი გახდა ყოველთვიური 100 მილიონი მსმენელით, 2023-ის ბოლოს კი იგი ჟურნალმა Time-მა წლის ადამიანად დაასახელა.

ტეილორ სვიფტის გავლენა ახლა იმდენად დიდია, რომ წლის დასაწყისში ევროკომისიამ პოპმუსიკოსს ახალგაზრდების საარჩევნოდ მობილიზებაში დახმარებაც სთხოვა. მედია იმაზეც ალაპარაკდა, რომ მუსიკოსს 2024 წლის აშშ-ის საპრეზიდენტო არჩევნებზეც შეუძლია გავლენის მოხდენა.

თუ მუსიკა შენი ცხოვრების განუყოფელი ნაწილია და ამ თემაზე მეტის გაგება გინდა, შემოგვიერთდი ჯგუფში ერთი სიმღერაც და...