აზერბაიჯანის ხელისუფლებამ, კორონავირუსის პანდემიასთან დაკავშირებით, ქვეყანაში დაწესებული სპეციალური საკარანტინო რეჟიმი კიდევ ორი თვით, 2024 წლის 1 ოქტომბრამდე გაახანგრძლივა.

ეხო კავკაზას ინფორმაციით, დადგენილებას ხელი პრემიერ-მინისტრმა ალი ასადოვმა მოაწერა.

"ქვეყანაში კოროვირუსული ინფექციის გავრცელებისა და მისი შესაძლო შედეგების პრევენციის მიზნით, აზერბაიჯანის რესპუბლიკის ტერიტორიაზე სპეციალური საკარანტინო რეჟიმის მოქმედების ვადა 2024 წლის 1 ოქტომბრის 06:00 საათამდე გახანგრძლივდეს", — აღნიშნულია წერილში.

ქვეყნის სახმელეთო საზღვრები 2020 წლის გაზაფხულიდან არის დაკეტილი. ბაქომ განაცხადა, რომ შეინარჩუნებს საკარანტინო რეჟიმს "სანამ საჭირო იქნება". ქვეყანაში შესვლა შესაძლებელია მხოლოდ საჰაერო გზით. ამავდროულად, უცხოელებს და მოქალაქეობის არმქონე პირებს შეუძლიათ რესპუბლიკის დატოვება სახმელეთო გზით.

ჯანდაცვის მსოფლიო ორგანიზაციამ გლობალური ჯანმრთელობის საგანგებო მდგომარეობის დასრულება, COVID-19 პანდემიის გამო, 2023 წლის 5 მაისს გამოაცხადა.