საქართველოს პრეზიდენტი, გიორგი მარგველაშვილი თავის საპარლამენტო მდივანსა და პარლამენტის თავმჯდომარის შორის დაპირისპირებას ეხმაურება. მარგველაშვილის განცხადებით, ანა დოლიძე არც ძველი კომკავშირელია და არც ახალი კომკავშირის მშენებელი. პრეზიდენტი დოლიძეს ახასიათებს როგორც ძლიერ, ღირებული ფასეულობების მქონე, პრინციპულ, პროფესიონალდა კვალიფიციურ ადამიანს:

"ალბათ ამიტომაც გახდა ანა დოლიძე შეურაცხყოფის სამიზნე "ქართული ოცნების" ზოგიერთი წარმომადგენლისთვის. ალბათ ამ პრინციპულობის გამო უშლიან მას ხელს კონსტიტუციური მოვალეობის შესრულებაში. ალბათ ამიტომ არის მიუღებელი არამარტო საპარლამენტო მდივნის თანამდებობაზე, არამედ ადამიანის უფლებათა ევროპული სასამართლოს მოსამართლეობის კანდიდატად და საქართველოს უზენაესი სასამართლოს მოსამართლეობის კანდიდატად."

გიორგი მარგველაშვილის განცხადებით, როდესაც ქვეყანაში უამრავი საჭირბოროტო საკითხია გადასაჭრელი, გამოგონილი დაპირისპირებების შექმნა, ხალხისთვის მნიშვნელოვანი დღის წესრიგიდან გაქცევა ახალი არ არის. პრეზიდენტი პარლამენტს მოუწოდებს, დაუბრუნდეს კანონშემოქმედებით საქმიანობას, დეპუტატები კი, კონცენტრირდნენ ქვეყანაში არსებულ რეალურ პრობლემებზე.

26 ივლისს, პარლამენტში შვიდი თვითმმართველი ქალაქის გაუქმებაზე პრეზიდენტის შენიშვნების განხილვის შემდეგ, შემაჯამებელი სიტყვით გამოსვლისას, ირაკლი კობახიძემ ანა დოლიძეს სიტყვა რამდენჯერმე შეაწყვეტინა. კობახიძის მტკიცებით, დოლიძე საჯარო მოსამსახურეა და ეთიკური სტანდარტის თანახმად, მას პოლიტიკური განცხადებების გაკეთება არ შეუძლია.

სხდომის დასრულების შემდეგ, ანა დოლიძემ ირაკლი კობახიძეს უზრდელი და თანამდებობისთვის შეუფერებელი უწოდა.