ბაქოში აზერბაიჯანის ოპოზიციური პარტიის, მუსავატის წევრი მოკლეს. მკვლელობაში მისი თანამშრომელია ბრალდებული.

9 მაისს ნათიგ მეჰდის გაუჩინარების შესახებ მისმა ძმიშვილმა განაცხადა, პოლიტიკოსის გარდაცვალების შესახებ ინფორმაცია შინაგან საქმეთა სამინისტრომ და პროკურატურამ 14 მაისს გაასაჯაროეს.

მეჰდი ორი დღის შემდეგ დაკრძალეს.

გენერალური პროკურორის განცხადებით, მკვლელობაში ბრალდებულია მეჰდის კოლეგა, ელსევარ ისლამოვი. მუსავატის პარტიის წევრი მუშაობდა ბაქოს სკოლაში, დაცვის თანამშრომლად, ხოლო ისლამოვი — სკოლის ფინანსური დირექტორის მოადგილე იყო.

მუსავატის სპიკერმა, მუსტაფა ჰაჯიბეილიმ განუცხადა OC Media-ს, რომ შესაძლოა, ისლამოვი მმართველი პარტიის წევრი ყოფილიყო და კონფლიქტი მათ პოლიტიკურ პოზიციებს გამოეწვია.

"ოპოზიციური პარტიის წევრებს უჭირთ სამუშაოს შოვნა, რის გამოც საზღვარგარეთ განათლებამიღებული ადამიანი მუშაობდა სკოლაში დაცვის თანამშრომლად“, — ამბობს ჰაჯიბეილი. "ეს დისკრიმინაციაა, მაგრამ მას არჩევანი არ აქვს, თუ სურს ცხოვრების შოვნა. ეს არ არის პირველი შემთხვევა, როდესაც ჩვენი პარტიის წევრები მსგავს სიტუაციაში აღმოჩნდნენ".

ჰაჯიბეილმა აღნიშნა, რომ მკვლელობის მოტივებთან დაკავშირებით დამატებითი ინფორმაციაა საჭირო.

"შინაგან საქმეთა სამინისტრომ და პროკურატურამ განაცხადეს, რომ მკვლელობა კონფლიქტის გამო მოხდა. უცნობია, რაზე მოხდა კამათი. სამწუხაროდ, სამართალდამცავი ორგანოები, რომლებსაც არ ეშინიათ საგამოძიებო საიდუმლოების გამჟღავნება, ამ შემთხვევაში შემოიფარგლებიან მხოლოდ "კამათის" ხსენებით", — თქვა მან.

პროკურატურის განცხადებაში აღნიშნულია, რომ დამნაშავეს განსაკუთრებული სისასტიკით ჩადენილი განზრახ მკვლელობის ბრალდებით ასამართლებდნენ.

მუსავატის ადვოკატმა ნემატ კარიმლიმ OC Media-ს განუცხადა, რომ მკვლელობის დეტალები არ გახმაურებულა და მან არ იცოდა, თუ რა ფაქტორების გამო არის დანაშაული კლასიფიცირებული, როგორც "განსაკუთრებული სისასტიკით ჩადენილი".

მუსავატის თავმჯდომარემ ისა გამბარმა ოთხშაბათს გააზიარა განცხადება მეჰდის მკვლელობასთან დაკავშირებით.

"პარტია მუსავატი ვაცხადებთ, რომ აღშფოთებულები ვართ ნათიგ მეჰდის მკვლელობით და ველით, რომ მკვლელი (ან მკვლელები) სამართალდამცავი ორგანოების მიერ რაც შეიძლება მალე გამოვლინდება“, — წერს გამბარი.

სტატიაში წარმოდგენილი შეხედულებები ეკუთვნის ავტორს და არ წარმოადგენს On.ge-ის პოზიციას. მასალა ქვეყნდება OC Media-სთან პარტნიორობის ფარგლებში, რომლის შედეგად, გამოცემის სტატიები ამიერიდან ოთხ ენაზე გავრცელდება. საქართველოში OC Media-ს პარტნიორი On.ge-ა. სტატია ინგლისურად შეგიძლიათ წაიკითხოთ აქ.