მოკლედ: საპარლამენტო უმრავლესობის ლიდერი, მამუკა მდინარაძე ამერიკის ელჩის, რობინ დანიგანის მიერ, რუსულ კანონთან დაკავშირებით გაკეთებულ განცხადებას გამოეხმაურა.

დეტალები: "თუკი ჩვენ მეგობრები გვეტყვიან, რომ, მოდი, თქვენ ქართულად აღარ ილაპარაკოთ და რუსები იტყვიან, კარგია, ესენი ქართულად რომ ლაპარაკობენ, ჩვენ ქართულად ლაპარაკი უნდა შევწყვიტოთ თუ უნდა გავაგრძელოთ?", — იკითხა მდინარაძემ დღეს, 11 აპრილს, ჟურნალისტებთან.

რა თქვა დანიგანმა: 10 აპრილს, დანიგანმა თქვა, რომ აშშ-მა როგორც საჯაროდ, ასევე, მთავრობასთან პირად საუბრებში გამოთქვა სერიოზული შეშფოთება რუსულ კანონთან დაკავშირებით.

  • "თუ გექნებათ კანონპროექტი, რომელზეც თქვენი დასავლელი პარტნიორები და მეგობრები გეუბნებიან, რომ სერიოზული შეშფოთება აქვთ, მაგრამ ოკუპანტი მიესალმება მას, არის თუ არა ეს სასიკეთო თქვენი ქვეყნისთვის, ამაზე უნდა დასვათ კითხვა", — თქვა ელჩმა.
  • მისივე თქმით, ეს კანონპროექტი არ არის ამერიკული კანონმდებლობის მსგავსი.

მამუკა მდინარაძის ამ განცხადებას ფეისბუქზე გამოეხმაურა მწერალი ლაშა ბუღაძე, სადაც მდინარაძეს "ამორალური მატყუარა" უწოდა და აღნიშნა, რომ რუსები დღესაც უკრძალავენ გალში ქართველებს ქართულად ლაპარაკს.

გაიგე მეტი: ოკუპირებულ აფხაზეთსა და ცხინვალში მიზანმიმართულად იდევნება და იკრძალება ქართული ენა — DRI