8-წლიანი პატიმრობის შემდეგ ჯიფსი როუზ ბლანჩარდი ციხიდან 3 თვის წინ გაათავისუფლეს. ციხეში ყოფნის პერიოდში, 2022 წლის ივლისში, ჯიფსი რაიან სკოტ ანდერსონზე დაქორწინდა. ციხის დატოვებიდან 3 თვის შემდეგ კი, ჯიფსიმ სოციალურ ქსელში პოსტი გამოაქვეყნა, რომლითაც საზოგადოებას აცნობა, რომ განქორწინდა.

"ბევრი ადამიანი მეკითხება, თუ რა ხდება ჩემს ცხოვრებაში. სამწუხაროდ, მე და ჩემი ქმარი განქორწინების გზას ვადგავართ. ჩემი ოჯახი და მეგობრები მხარს მიჭერენ და ამ პერიოდის გადატანაში მეხმარებიან. ჩემი გულის მოსმენას ვსწავლობ, ახლა კი მჭირდება დრო, რათა საკუთარი თავი ვიპოვო", — წერს ჯიფსი სოციალურ ქსელში.

ფოტო: Instagram

შეგახსენებთ, რომ ჯიფსი როუზ ბლანჩარდი სასჯელს დედის მკვლელობისთვის იხდიდა. 2015 წლის ივნისში ჯიფსიმ თავის იმდროინდელ შეყვარებულ ნიკთან ერთად, დედამისის მკვლელობა დაგეგმა. ჯიფსის მკვლელობის დაგეგმვისთვის 10 წლით თავისუფლების აღკვეთა მიუსაჯეს და დროზე ადრე გაათავისუფლეს, ნიკს კი, მკვლელობის ჩადენისთვის მთელი ცხოვრების ციხეში გატარება მოუწევს.

როგორც ცნობილია, დედის მკვლელობას წინ მძიმე ისტორია უძღოდა: ჯიფსის დედას მიუნჰაუზენის დელეგირებული სინდრომი ჰქონდა, რის გამოც სჯეროდა და შვილსაც აჯერებდა, რომ მას სხვადასხვა დაავადება აწუხებდა, შემდეგ კი შესაბამის სიმპტომებს სამედიცინო პროცედურებით ხელოვნურად იწვევდა. ჯიფსის თქმით, როდესაც 7 წლის იყო, დედამისი ამტკიცებდა, რომ მას კუნთოვანი დისტროფია და ლეიკემია ჰქონდა, რის გამოც შვილს თავი გადაპარსა და ეტლით გადაადგილება დააწყებინა, მიუხედავად იმისა, რომ ჯიფსის სიარული შეეძლო.

ჯუფსიმ და რაიან სკოტ ანდერსონმა 2022 წელს ციხეში გამართულ ცერემონიაზე იქორწინეს, რომელსაც მეგობრები არ ესწრებოდნენ. 2023 წელს People-თან მიცემულ ინტერვიუში ჯიფსიმ განაცხადა, რომ გათავისუფლების შემდეგ საქორწინო წვეულების გამართვას აპირებდა. ინტერვიუში ჯიფსიმ იმის შესახებაც ისაუბრა, რომ ქმართან ერთად საცხოვრებლად გადასვლას მოუთმენლად ელოდა.

ჯიფსის უჩვეულო ისტორია საფუძვლად დაედო Hulu-ის 2019 წლის მინისერიალს The Act, ცოტა ხნის წინ კი გამოვიდა დოკუმენტური სერიალი ჯიფსი როუზ ბლანჩარდის აღიარებები საპატიმროში (The Prison Confessions of Gypsy Rose Blanchard).