აშშ-ში, ფლორიდის შტატის ქალაქ მაიამიში ზოოპარკის ბინადარი პატარა ჟირაფი მკვდარი იპოვეს. უცნობია, რას მოჰყვა სამი თვის ასაკის ჟირაფის სიკვდილი, თუმცა, ზოოპარკის ცნობით, დადგინდა, რომ ცხოველი კისრის მოტეხილობამ იმსხვერპლა.

"საშინელი დანაკარგია", — აღნიშნავენ ზოოპარკის წარმომადგენლები, — "ამჟამად ყველა საჭირო პროცედურა გულისყურით სრულდება, რათა სამომავლოდ მსგავსი ინციდენტები თავიდან ავიცილოთ".

განცხადებაში ასევე ნათქვამია, რომ შემთხვევა ღამით მოხდა, თანაც იმ ადგილას, სადაც სამეთვალყურეო კამერები დამონტაჟებული არაა. ზოოპარკის ადმინისტრაცია ვარაუდობს, რომ პატარა ჟირაფი რაღაცამ შეაშინა, გაქცევის შემდეგ კი ის ღობეს შეეჯახა, რამაც სასიკვდილო დაზიანება მიაყენა.

///

ჟირაფების კისრით დაზიანებით სიკვდილი კი, ზოოპარკებსა და სხვა დაწესებულებებში უჩვეულო ამბავი არაა; ცხოველთა უფლებადამცველი ორგანიზაცია PETA-ის ცნობით, ბოლო წლებში აშშ-ის სხვადასხვა დაწესებულებაში უამრავი ჟირაფი დაიღუპა კისრის მოტეხილობით. ორგანიზაცია აღნიშნავს, რომ ჟირაფები ბუნებრივ ჰაბიტატში ჯოგურად ცხოვრობენ და სტრესულ სიტუაციებში დიდი სისწრაფით გარბიან, ამ ქცევას კი დატყვევებული ცხოველები ხშირად მიჰყავს სიკვდილამდე.

"ველურ გარემოში ჟირაფების სიცოცხლის ხანგრძლივობა 25 წელს აღწევს, მაგრამ ტყვეობაში, სადაც დაშავების შემთხვევები ხშირია, ისინი იშვიათად ცოცხლობენ ამდენ ხანს", — წერს PETA, — "ზოოპარკებში ამტკიცებენ, რომ ჟირაფების იქ გამრავლებით პოპულაციის შენარჩუნებას უზრუნველყოფენ, მაგრამ ბევრი ცხოველი მაშინვე იღუპება, როგორც კი წამოიზრდება; რომც გადარჩნენ, დატყვევებულ ჟირაფებს ველურ გარემოში აღარ აბრუნებენ".

აღსანიშნავია, რომ ცოტა ხნის წინ თბილისის ზოოპარკმაც დააანონსა ჟირაფების ჩამოყვანა.