რა ხდება: პროკურატურამ ყალბი ოფიციალური დოკუმენტების გასაღების და უკანონო შემოსავლის ლეგალიზაციის ფაქტებზე, ორ პირს ბრალდება წარუდგინა.

დეტალები: უწყების ინფორმაციით, გამოძიებით დადგენილია, რომ ეს ორი ადამიანი, დანაშაულში ჩართულ სხვა პირებთან ერთად, საქართველოში ამზადებდა ევროპული ქვეყნების ოფიციალურ დოკუმენტებს და მოქალაქეებზე ასაღებდა.

  • მათ მიერ დამზადებულ ყალბ დოკუმენტებს შორის არის მართვის მოწმობები, ბინადრობის და მუშაობის უფლების დამადასტურებელი საბუთები.
  • ამ გზით, სქემაში მონაწილე პირებმა, დაახლოებით, 141 000 ევრო და 36 000 აშშ დოლარი მიისაკუთრეს.
  • მიღებული განსაკუთრებით დიდი ოდენობით უკანონო შემოსავლის ლეგალიზების მიზნით, ბრალდებულებმა თბილისში საცხოვრებელი ბინა შეიძინეს და სხვის სახელზე დაარეგისტრირეს.

დაკავებულებს ბრალდება წარედგინათ მუხლებით, რომელიც ყალბი ოფიციალური დოკუმენტის გასაღებას და უკანონო შემოსავლის ლეგალიზაციას გულისხმობს.

მათ 9-დან 12 წლამდე პატიმრობა ემუქრებათ.

საქმეზე გრძელდება გამოძიება, დანაშაულებრივ ქმედებებში მონაწილე სხვა პირთა გამოვლენის მიზნით.