რა ხდება: რუსი ოპოზიციონერი პოლიტიკოსის, ალექსეი ნავალნის ორი სასამართლო მოსმენა, რომელიც ორშაბათს იყო დაგეგმილი, იანვრამდე გადაიდო.

  • ნავალნის თანამებრძოლები ამბობენ, რომ ის ადვოკატს 6 დეკემბრის შემდეგ აღარ უნახავს.
  • რუსეთში ადამიანის უფლებების კუთხით გაეროს სპეციალური მომხსენებლის, მარიანა კაცაროვას თქმით, შემაშფოთებელია, რომ ნავალნის ადგილსამყოფლის შესახებ ცნობილი ამ დრომდე არ არის.
  • გასულ პარასკევს, რუსეთის პენიტენციურმა სამსახურმა განაცხადა, რომ ამჟამად, ნავალნი, ვლადიმირის ოლქიდან ქვეყნის სხვა ნაწილში გადაჰყავთ.
  • ასეთი ტრანსფერები, რომლის დროსაც სამართალდამცველებს პატიმრები გრძელ გზაზე, მატარებლით გადაჰყავთ, ხან კვირების განმავლობაში გრძელდება.

19 დეკემბერს, ნავალნის სპიკერმა, კირა იარმიშმა X-ზე დაწერა, რომ უკვე 2 კვირაა, ოპოზიციონერი პოლიტიკოსის შესახებ არაფერი იციან.

  • ნავალნის ანტიკორუფციული ფონდის ადვოკატებმა, გასული კვირის ბოლოს, 200-ზე მეტ საპყრობილეს მიმართეს კითხვით, იმყოფებოდა თუ არა მათთან პოლიტიკოსი, თუმცა პასუხებს ამ დრომდე ელიან.
  • მოსალოდნელი იყო, რომ ალექსეი ნავალნის გადაიყვანდნენ სპეციალური რეჟიმის კილონიაში, რაც რუსეთის ციხეების სისტემაში ყველაზე მკაცრ დაწესებულებად არის მიჩნეული.

ეჭვები პოლიტიკოსის ჯანმრთელობასთან დაკავშირებით

კაცაროვამ თქვა, რომ ნავალნის, პატიმრობის დროს, მუდმივად არასათანადოდ ეპყრობოდნენ, მას ჩამორთმეული ჰქონდა ადეკვატური სამედიცინო დახმარების შესაძლებლობა, რაც აზიანებდა მის ჯანმრთელობას და საფრთხეს უქმნიდა მის სიცოცხლეს.

  • ნავალნის მხარდამჭერები მის ჯანმრთელობასთან დაკავშირებით პოლიტიკოსის გაუჩინარებამდეც სწუხდნენ.

კონტექსტი: ალექსეი ნავალნი, რომელიც რუსეთის პრეზიდენტის, ვლადიმირ პუტინის ელიტას მუდმივად აკრიტიკებდა და მათ კორუფციაში ამხელდა, 2021 წელს დააპატიმრეს.

  • ის სამართალდამცველებმა მაშინ აიყვანეს, როდესაც გერმანიიდან რუსეთში დაბრუნდა. გერმანიაში პოლიტიკოსს მძიმე ინტოქტიკაციის დიაგნოზით მკურნალობდნენ. დამოუკიდებელი გამომძიებლები ამბობენ, რომ ის რუსეთის ხელისუფლებამ მოწამლა.
  • სასამართლომ ნავალნი ბოლოს აგვისტოში გაასამართლა ექსტრემისტულ საქმიანობასთან დაკავშირებული ბრალდებების გამო და დამატებითი 19 წელი მიუსაჯა. მას უკვე მისჯილი ჰქონდა 11 წელი.
  • მისი თანამებრძოლები ამბობენ, რომ ნავალნის რეგულარულად ათავსებდნენ სამარტოო საკანში, სადაც მას, სულ მცირე, 266 დღე აქვს გატარებული.