იცით, რას ნიშნავს ინგლისური სლენგი Rizz? ეს ოქსფორდის 2023 წლის სიტყვა გახლავთ. წელი ნელ-ნელა იწურება და ბოლო 12 თვის შეჯამების დროც მოდის. ამდენად, გასულ კვირასაც მსგავსი ამბები ჭარბობდა; მაგალითად, კიდევ ის გავიგეთ, რომელი იქნება 2024 წლის მთავარი ფერი. ეს და პოპკულტურის სხვა მნიშვნელოვანი ამბები რომ არ გამოგრჩეთ, ტრადიციულად, გასული კვირა ერთ სტატიად შეგიჯამეთ.

1. ცნობილი გახდა, რომ Hulu-ის ახალ სერიალში კიმ კარდაშიანს ვიხილავთ

Deadline-ის ინფორმაციით, ახალ სერიალში კიმ კარდაშიანს ადვოკატის როლში ვიხილავთ. სერიალის სიუჟეტის მიხედვით, კიმის პერსონაჟი განქორწინების საქმეებში ლოს-ანჯელესის ყველაზე წარმატებული ადვოკატია, რომელსაც საკუთარი იურიდიული ფირმაც აქვს. სერიალის აღმასრულებელი პროდიუსერი კი კარდაშიანის დედა, კრის ჯენერი იქნება.

უფრო ვრცლად წაიკითხე აქ.

2. ქართველი მომღერალი Nini Iris ამერიკული ვოისის ნახევარფინალში გადავიდა

Nini Iris კონკურსის 8 საუკეთესო მონაწილეს შორის დაასახელეს, მე-9 მონაწილე კი აუტსაიდერებიდან მაყურებლის ხმების მიხედვით შეირჩა. ამერიკული The Voice-ის შემდეგ ეტაპზე ბრძოლას 9 კონკურსანტი აგრძელებს.

უფრო ვრცლად წაიკითხე აქ.

3. ბობ მარლის ცხოვრებაზე გადაღებული ფილმის ტრეილერი გამოვიდა

ბობ მარლის ცხოვრების შესახებ გადაღებულ ფილმს მაყურებელი მალე იხილავს. Bob Marley: One Love — ასე ჰქვია ახალ ბიოგრაფიულ ფილმს, რომელშიც მთავარ როლს Peaky Blinders-ის მსახიობი კინგსლი ბენ-ადირი ითამაშებს. Bob Marley: One Love-ის ტრეილერი კი უკვე გამოვიდა.

უფრო ვრცლად წაიკითხე აქ.

4. ოქსფორდის წლის სიტყვა დასახელდა

ოქსფორდის 2023 წლის სიტყვად დასახელდა Rizz, რომელიც ლექსიკონით განისაზღვრება, როგორც "პეწი, მიმზიდველობა ან ეშხი". უფრო ზუსტად, ეს არის სასიყვარულო ან სექსუალური პარტნიორის მოხიბვლის უნარი. ტერმინი ინტერნეტსივრცეში გაჩნდა რამდენიმე წლის წინ და ფიქრობენ, რომ ის სიტყვა "ქარიზმის" შემოკლებული ვარიანტია.

უფრო ვრცლად წაიკითხე აქ.

5. გამოვიდა ტრეილერი ნეტფლიქსის ახალი სერიალისა, სადაც მთავარ როლს სოფია ვერგარა ასრულებს

ცნობილი კოლუმბიელი მსახიობი და მოდელი სოფია ვერგარა, რომელმაც სახელი კომედიებში მონაწილეობით გაითქვა, ნეტფლიქსის ახალ მინისერიალში ნარკობარონესას განასახიერებს. სერიალი Griselda ნამდვილი ნარკომოვაჭრის, "შავ ქვრივად" და "კოკაინის ნათლიად" წოდებული გრისელდა ბლანკოს ცხოვრებას ეფუძნება.

უფრო ვრცლად წაიკითხე აქ.

6. ახალ ინტერვიუში ანჯელინა ჯოლიმ თავის პირად ცხოვრებაში დაგეგმილ სიახლეებზე ისაუბრა

ჯოლიმ ინტერვიუში ბრედ პიტის დაშორების შესახებ ისაუბრა და თქვა, რომ როცა განქორწინების საქმე დასრულდება, ლოს-ანჯელესის დატოვებას და საცხოვრებლად კამბოჯაში გადასვლას აპირებს. მსახიობმა პირველი შვილი, მედოქსი, სწორედ კამბოჯაში იშვილა და გარემოსდაცვითი არასამთავრობო ორგანიზაციაც დააარსა, რის გამოც მსახიობს 2005 წელს კამბოჯის მოქალაქეობა მიენიჭა და იქ სახლიც აქვს.

უფრო ვრცლად წაიკითხე აქ.

7. Pantone-მა 2024 წლის ფერი დაასახელა

ამერიკულმა კომპანია Pantone-მა 2024 წლის მთავარი ფერი დაასახელა. გაიცანით Peach Fuzz, რომელიც ძალიან ახლოსაა ატმისფერთან. უფრო ზუსტად კი, როგორც კომპანია წერს, "ნაზ, ხავერდოვან ატმისფერთან".

უფრო ვრცლად წაიკითხე აქ.

8. ნეტფლიქსის რეალითი შოუ Squid Game-ის გამარჯვებულმა $4,56 მილიონი მოიგო

ნეტფლიქსის რეალითი შოუ Squid Game: The Challenge-ის გამარჯვებული 55 წლის მაი ვეილენი გახდა და $4,56 მილიონი მოიგო. ნოემბერში ნეტფლიქსმა პოპულარული სერიალ Squid Game-ის მიხედვით გადაღებული რეალითი შოუ გამოუშვა.

უფრო ვრცლად წაიკითხე აქ.