რატომ არის მნიშვნელოვანი: დღეს, 8 ნოემბერს გამოქვეყნდა ევროკომისიის ყოველწლიური მოხსენება გაფართოების შესახებ.

  • მათ რეკომენდაცია გასცეს ევროსაბჭოსთვის, მიენიჭოს საქართველოს ევროკავშირის კანდიდატი ქვეყნის სტატუსი.
  • გადაწყვეტილება გამოაცხადა ევროკომისიის პრეზიდენტმა, ურსულა ფონ დერ ლეინმა.

დეტალები: ევროკომისიის რეკომენდაციას საქართველოსთვის კანდიდატის სტატუსის მინიჭების თაობაზე, გამოეხმაურა საერთაშორისო საზოგადოებაც.

  • ევროკავშირის უმაღლესმა წარმომადგენელმა საგარეო ურთიერთობებისა და უსაფრთხოების საკითხებში, ჯოზეფ ბორელმა სოციალურ ქსელში ვიდეო გაავრცელა, სადაც კიდევ ერთხელ დაადასტურა მათი მხარდაჭერა საქართველოს მიმართ.
  • "ქართველმა ხალხმა არაერთხელ აჩვენა თავისი ურყევი ერთგულება ევროპული ღირებულებებისადმი. ეს ვიგრძენი, როცა ცოტა ხნის წინ საქართველოში ვიყავი და თბილისის ქუჩებში ევროკავშირის უამრავი დროშა დავინახე", — ამბობს ბორელი.
  • ევროპარლამენტარი, ვიოლა ფონ კრამონი აღნიშნავს, რომ ევროკომისიის დადებითი შეფასება ქართველი ხალხის დამსახურებაა.
  • "ჩვენ, საქართველოს მეგობრები ევროპარლამენტში, ვულოცავთ ქართველ ხალხს კომისიის ისტორიულ რეკომენდაციას", — წერს ის.
  • საფრანგეთის ელჩი საქართველოში, შერაზ გასრი მიიჩნევს, რომ ახლა განსაკუთრებით მნიშვნელოვანია ხელისუფლებამ მკაფიო გადაწყვეტილებები მიიღოს.
  • "საქართველო ევროპაა და ქართველები ევროპელები არიან", — წერს კიდევ ერთი ევროპარლამენტარი, ანა ფოტიგა.
  • ევროკომისიის მოხსენებას გამოეხმაურა აშშ-ის საელჩოც. ისინი ამბობენ, რომ აშშ გააგრძელებს საქართველოს მხარდაჭერას.
  • "დღევანდელი რეკომენდაცია არის უზარმაზარი წინგადადგმული ნაბიჯი საქართველოს ევროატლანტიკური ინტეგრაციისთვის", — აღნიშნულია საელჩოს განცხადებაში.
  • ევროპარლამენტარი, პეტრას აუსტრევიჩუსი წერს, რომ მხოლოდ თავისუფალი და სამართლიანი არჩევნები იქნება საკმარისი მტკიცებულება საქართველოს დემოკრატიული ტრანსოფორმაციის შესახებ.
  • "ევროპარლამენტი მიესალმება რეკომენდაციას საქართველოსთვის კანდიდატის სტატუსის მინიჭებაზე", — წერს ევროპარლამენტის პრეზიდენტი, რობერტა მეცოლა.
  • ევროკომისიის გადაწყვეტილებას საქართველოსთან დაკავშირებით დადებითად აფასებს რუმინეთის პრეზიდენტი, კლაუს იოჰანისიც.
  • ევროპარლამენტარი, რასა იუკნევიჩიენე აღნიშნავს, რომ საქართველოს ევროპული მომავალი ქართველმა ხალხმა გადაარჩინა.
  • "ამჟამინდელი ხელისუფლებაა პასუხისმგებელი იმაზე, რომ საქართველო, რომელიც ოდესღაც ამ პროცესში ლიდერი იყო, დღეს უკრაინასა და მოლდოვასთან ერთად არ არის", — წერს ის.