ავიაკომპანია Wizz Air-მა On.ge-სთვის დღეს გამოგზავნილი ოფიციალური წერილით განმარტა, 5 ივლისს რატომ ვერ შესრულდა ქუთაისი-ბერლინის რეისი. საქართველოში ვერ ჩამოვიდნენ ბერლინიდან ქუთაისში მომავალი მგზავრებიც.

როგორც მიღებული პასუხიდან ირკვევა, ვიზეარის რეისების [W6 6407 ქუთაისიდან ბერლინში და W6 6408 ბერლინიდან ქუთაისში] გაუქმების მთავარი მიზეზი ქუთაისში არსებული არახელსაყრელი ამინდის პირობები იყო.

"ვიზეარი დაუკავშირდა ყველა დაზარალებულ მგზავრს და ვიზეარის ალტერნატიულ რეისებზე ბილეთის უფასოდ გადაცვლა შესთავაზა. ვიზეარის სამომხმარებლო შეთანხმებისა და ევროკავშირის რეგულაციის ფარგლებში, ჩვენ სრულად ავანაზღაურებთ იმ ხარჯებს, რომლებიც მგზავრებს რეისების გადადების გამო მიადგათ".

ვიზეარი მგზავრებს ბოდიშს უხდის და აცხადებს, რომ თავისი თანამშრომლებისა და მგზავრების უსაფრთხოება მისთვის ყველაზე მნიშვნელოვანია.