რა ხდება? 23 ოქტომბერს, ჰამასის მიერ გათავისუფლებული ორი ტყვე, ნურიტ კუპერი და იოხევედ ლიფშიცი, თელ-ავივში, საავადმყოფოში იმყოფებიან. მათი ჯანმრთელობის მდგომარეობა დამაკმაყოფილებელია.

  • 85 წლის ლიფშიცმა ჰამასის ტყვეობაში გატარებული დღეების შესახებ პრესკონფერენციაზე მედიასთან ისაუბრა.

რატომ არის მნიშვნელოვანი: 7 ოქტომბერს ჰამასმა ტყვედ, სულ მცირე, 222 ადამიანი გაიტაცა, მათ თავდასხმებს ისრაელში 1400-ზე მეტი ადამიანი ემსხვერპლა.

  • ნურიტ კუპერისა და იოხევედ ლიფშიცის გათავისუფლების შესახებ ცნობილი გუშინ, გვიან ღამით გახდა.
  • სამი დღის წინ ჰამასმა კიდევ 2 მოქალაქე გაათავისუფლა.

დეტალები: ქალი ამბობს, რომ ჯოჯოხეთი გაიარა. ტერორისტებმა ისრაელში მდებარე დასახლებიდან, კიბუციდან მოტოციკლით გაიტაცეს და ღაზის სექტორში გადაიყვანეს. მგზავრობისას სხეულის დაზიანებები მიიღო, ამბობს, რომ უჭირდა სუნთქვაც.

  • როგორც ლიფშიცი იხსენებს, მოტოციკლიდან გადასვლის შემდეგ მას დახვდნენ ადამიანები, რომლებმაც უთხრეს, რომ თუ ყურანს იწამებდა, მას არავინ არაფერს დაუშავებდა. მისივე თქმით, ტერორისტებმა მას საათი და სამკაული წაართვეს.
  • ამბის თხრობაში შვილი, შარონი ეხმარება და ჰყვება, რომ ქალს, კიდევ 24 ტყვესთან ერთად, მიწისქვეშა გვირაბებში, ფეხით რამდენიმე კილომეტრის გავლა აიძულეს. ლიფშიცი უამრავ გვირაბს ობობას ქსელს ადარებს.

იოხევედ ლიფშიცი ამბობს, რომ ოთხ ადამიანთან ერთად მოათავსეს მიწისქვეშა გვირაბში არსებულ ოთახში და ეძინათ იატაკზე დაფენილ ლეიბზე. მათ მოსანახულებლად, 2-3 დღეში ერთხელ, ექიმი მიდიოდა.

  • ლიფშიცის თქმითვე, ერთ-ერთ ტყვეს, რომელიც მოტოციკლზე მგზავრობისას დაშავდა, ექიმი მკურნალობდა. ტყვეებს აძლევდნენ საჭირო წამლებსაც.
  • გვირაბში დატყვევებულ ადამიანებს აძლევდნენ კიტრსა და ყველს, ლიფშიცის ქალიშვილის განმარტებით, იმავეს ჭამდნენ ჰამასის წევრებიც.
  • იოხევედ ლიფშიცის თქმით, მისი ამბავი არ დასრულდება, ვიდრე სახლებში ყველა ტყვე არ დაბრუნდება.