NASA Space Apps Challenge მსოფლიოში ერთ-ერთ ყველაზე მასშტაბური ჰაკათონია, რომელიც სხვადასხვა ქვეყანაში ყოველწლიურად ტარდება. პროექტი 300 ქალაქს მოიცავს და 1000-მდე მონაწილეს აერთიანებს. NASA Space Apps Challenge-ის მთავარი პარტნიორი საქართველოში წელს საქართველოს ბანკია.

ორდღიანი ღონისძიება 7-8 ოქტომბერს GITA-ში გაიმართა. პროექტში მონაწილეობის სურვილი 100-ზე მეტმა გუნდმა გამოთქვა, რომელთაგანაც 30-მდე გუნდი შეირჩა ჰაკათონში ჩასართავად. თუმცა პროექტს არც დანარჩენი მსურველები გამოეთიშნენ, ისინი ვირტუალურად ესწრებოდნენ ვორქშოპებს.

აღსანიშნავია, რომ NASA-ს პროექტი განკუთვნილია მათთვის, ვისაც აინტერესებს პროგრამირება, სთორითელინგი, დიზაინი, ტექნოლოგიები, ასტროფოტოგრაფია და ინოვაციები. შესაბამისად, მონაწილე გუნდები ორი დღის განმავლობაში ნასასა და მსოფლიოს მთავარი კოსმოსური ცენტრებისგან მიღებულ რეალურ მონაცემებზე მუშაობდნენ, რათა შეექმნათ გლობალური პრობლემების გადაწყვეტის საკუთარი, ინოვაციური გზები.

გარდა გუნდური შეჯიბრებისა, კონკურსის განმავლობაში მონაწილეებს შესაძლებლობა ჰქონდათ, დასწრებოდნენ ვორქშოპებს სხვადასხვა სასურველ თემაზე, რომელსაც დარგის წამყვანი სპეციალისტები უძღვებოდნენ. პროექტის ფარგლებში ჩატარდა შემდეგი ვორქშოპები:

• მონაცემთა მეცნიერების საფუძვლები — რუდოლფ ერემიანი, მონაცემთა მეცნიერი, Toptal;
• პროტოტიპირება — რუსო ჩაჩანიძე, Medialab-ის ხელმძღვანელი; ლუკა კაკაბაძე, აქსელერაციის პროგრამის ხელმძღვანელი, Medialab;
• Introduction to Large Language Models — გიორგი ჯვარიძე, MaxinAI-ის თანადამფუძნებელი და ინჟინერიის დირექტორი;
• მითები Software Engineering-ზე — მერაბ ტატო კუტალია, Google-ის ანდროიდ დეველოპერ ექსპერტი;
• ასტროფოტოგრაფია — სანდრო შუღლაძე, ასტროფოტოგრაფი;
• UI/UX დიზაინის საფუძვლები — ნიკ ოსიპოვი, დიზაინერი, სმარტ აკადემიის ლექტორი.

ღონისძიების ბოლოს პროფესიონალებისგან შემდგარმა ჟიურიმ კონკურსში მონაწილე გუნდებისგან საუკეთესო გამოავლინა, რომელიც სპეციალური პრიზით დასაჩუქრდა და რაც მთავარია, მიიღო უნიკალური შესაძლებლობა, საკუთარი იდეა წარადგინოს NASA Space Apps Challenge-ის გლობალურ კონკურსზე.

2022 წელს ნასას გლობალურ პროექტში მსოფლიოს სხვადასხვა ქვეყნიდან 10 გამარჯვებული გუნდი გამოვლინდა, გუნდებმა პრიზები სხვადასხვა კატეგორიაში მოიგეს. ტაივანის გუნდმა მიიღო პრიზი ტექნოლოგიის შემუშავებისთვის, რომელიც მზის ქარიშხლის პროგნოზირებისთვის გამოიყენება. ხელოვნებისა და ტექნოლოგიების კატეგორიაში პრიზი მიიღო მასაჩუსეტსის გუნდმა, მათ შექმნეს მოწყობილობა, რომელიც ინტერაქციული და კრეატიული გზით ხსნის კოსმოსურ ამინდს და მის გავლენას დედამიწაზე.

კონკურსში მონაწილეობა სრულიად უფასოა, მთავარია, გქონდეს ინტერესი და მოტივაცია, შენი იდეები კოსმოსურ, გლობალურ პრობლემებს დაუპირისპირო.

NASA Space Apps Challenge ხელმისაწვდომია ყველასთვის, ვისაც უყვარს მეცნიერება და აქვს ინოვაციური იდეები, პროექტის მიზანია მსოფლიო მასშტაბით პერსპექტიული ახალგაზრდების პოვნა და მათი შესაძლებლობების პლანეტისთვის სასარგებლოდ გამოყენება. გუნდში რეალურ მონაცემებზე მუშაობისას და ვორქშოფებზე დასწრებისას დიდ გამოცდილებას იღებ, ამიტომ აუცილებლად უნდა სცადო ბედი მაშინაც კი, თუ ფიქრობ, რომ განსაკუთრებული არ ხარ. შესაძლოა შენი პატარა და მარტივი იდეა გახდეს დიდი აღმოჩენების ინსპირაცია.

საქართველოს ბანკის მხარდაჭერით განხორციელებული საგანმანათლებლო პროექტების შესახებ ინფორმაციის მისაღებად ეწვიეთ ვებგვერდს.