თანამედროვე მუსიკისა და ვიზუალური ხელოვნების ფესტივალი SOU 2017 ბოლო წარმოდგენისთვის ემზადება. ორთვიან მუსიკალურ თავგადასავალს იაპონელი კომპოზიტორის, კეიჩირო შიბუიას პირველი ვოკალოიდური ოპერა დაასრულებს.

დასასრული - ამ სახელწოდების ოპერა არტისტმა და კომპოზიტორმა, იაპონიის ერთ-ერთი უდიდეს პოპ ვარსკვლავს, ჰუმანოიდ მომღერალს ჰაცუნე მიკუს მიუძღვნა.

ჰაცუნე მიკუ - ანიმეს ვირტუალური პერსონაჟია, რომელმაც მთელს იაპონიაში Vocaloid კულტურის განვითარება შეძლო. ის სინთეზატორული აპლიკაციის, Vocaloid-ის დახმარებით მღერის. დღეს ჰაცუნე მიკუს 3D კონცერტების ბილეთები თვალის დახამხამებაში იყიდება.

ფოტო: Youtube / კადრი ვიდეოდან

ოპერა დასასრული ორკესტრისა და ადამიანის ხმის გარეშე, მულტი 3D სურათებისა და ელექტრონული მუსიკის საშუალებითაა შექმნილი.

წარმოდგენის კოსტიუმებზე ლუი ვიტონის სახლმა, კერძოდ, ცნობილმა დიზაინერმა მარკ ჯეიკობსმა იმუშავა.

ჰაცუნე მიკუ თავის მოგზაურობას ეგზისტენციალური კითხვით იწყებს, რომელსაც საკუთარ თავს უსვამს: „მეც მოვკვდები?“. საკუთარი არსებობის ეჭვქვეშ დაყენებით, ჰოლოგრამული გამოსახულება დარბაზში მყოფებს დაუჯერებელ აუდიო-ვიზუალურ შოუს სთავაზობს.

ვოკალოიდურ ოპერას თბილისის ოპერისა და ბალეტის სცენა პირველად დაეთმობა.ღონისძიება 5 ივლისს ჩატარდება და 22:00 სთ.-ზე დაიწყება. ბილეთების შესაძენად ეწვიეთ TKT.GE-ს.

შეგახსენებთ, რომ თანამედროვე მუსიკისა და ვიზუალური ხელოვნების ფესტივალი საქართველოშ უკვე მეორე წელია ტარდება. ფესტივალის 2017 წლის პროგრამის ფარგლებში თბილისსა და რუსთავში ალვა ნოტოს, უილიამ ბასინკის, ლორენს ინგლიშის, რობერტ ჰენკეს, ანსამბლი მოდერნისა და სხვა, სულ 30 მდე ცნობილი არტისტის მუსიკალური საღამო გაიმართა. ფესტივალი Check in Georgia-ს ფარგლებში ტარდება. SOU 2017 15 მაისს გაიხსნა და 5 ივლისს დაიხურება.