უმცირესი ზომის ხელჩანთა, რომელიც ადამიანის თვალისთვის თითქმის შეუმჩნეველია, აუქციონზე 63,000$-ად გაიყიდა.

ფლუორესცენციური მოყვითალო ფერის ხელჩანთა, რომელიც ლუი ვიტონის დიზაინითაა ინსპირირებული, ნიუ-იორკის ხელოვნების კოლექტივის ნამუშევარია. ბრუკლინში დაფუძნებული ჯგუფი MSCHF ამტკიცებს, რომ მათი შექმნილი "მიკროსკოპული ჩანთა" ნემსის ყუნწში გაეტევა და ზღვის მარილის კვნიტზე უფრო პატარაა.

ჩანთა მიკროსკოპთან ერთად გაიყიდა, რომლის საშუალებითაც ჩანთის დანახვა უკეთ არის შესაძლებელი და ჩანს, რომ მასზე მცირე ასოებით ბრენდის ლოგო, LV (Louis Vuitton) არის დატანილი.

ლუი ვიტონი ჩანთის ორიგინალს 3,100$-4,300$-ად ყიდის. MSCHF-ის წარმომადგენელმა, კევინ ვისნერმა, New York Times-თან განაცხადა, რომ ფრანგული ბრენდის ნებართვა მისი ლოგოსა და დიზაინის გამოყენებისთვის არ უთხოვია.

აქამდე ჯგუფი არაერთი სკანდალური საქმით გამხდარა ცნობილი, მათ შორის, ენდი უორჰოლის გაყალბებული ნახატების გაყიდვით. ცოტა ხნის წინ ჯგუფმა მეტი პოპულარობა მოიპოვა, როდესაც მათი რეზინის ჩექმები, რომელთაც ზედ ანიმაციური გმირები ეხატა, ისეთ ვარსკვლავებს ეცვათ, როგორებიც Doja Cat, Iggy Azalea და Janelle Monáe არიან.