ერთიანი ნაციონალური მოძრაობის თბილისის მერობის კანდიდატმა, ძველ თბილისში, კანდიდატად წარდგენისას თქვა, რომ მისი მთავარი მიზანი დედაქალაქის მცხოვრებთა ყოფის გაუმჯობესებაა. უდუმაშვილის თქმით, თბილისი მისი სახლია:

"აქ დავიბადე და არსად სხვაგან ცხოვრებას არ ვაპირებ, აქ დავამთავრე სკოლა და უმაღლესი სასწავლებელი, აქ არის ჩემი მშობლების საფლავი, აქ ცხოვრობენ ჩემი საყვარელი ადამიანები, აქ მყავს დიდი სამეგობრო, ჩემთვის ძვირფასია მისი წარსული და მინდა ვიზრუნო მის აწმყოსა და მომავალზე".

უდუმაშვილის თქმით, მოვიდა დრო, მოისმინოს მოქალაქეთა აზრი თბილისის ქუჩებში, ეზოებში, სახლებში, პარკებსა და სკვერებში, მეტროსადგურებსა და ავტოსადგურებში - ყველგან, სადაც თბილისია:

"მოვიდა დრო, მოვიდე თქვენთან და მოგისმინოთ, რათა გავიგო რა გიჭირთ, როგორ ცხოვრობთ, რა გჭირდებათ იმისთვის, რომ იცხოვროთ უკეთესად. დღეს თბილისელები გაბრაზებულები ვართ იმიტომ, რომ არასდროს არ ყოფილა ჩვენი ქალაქი ასე უყურადღებოდ მიტოვებული, როგორც დღეს იმიტომ, რომ არასდროს ისე უგულებელყოფილი არ ყოფილა უგულებელყოფილი თბილისელების ნება, როგორც დღეს.

არასდროს ამდენი პრობლემა მოუგვარებელი არ ყოფილა და ამდენი გამოწვევა უპასუხოდ არ დარჩენილა, როგორც დღეს. დღეს, როგორც ჩემი თანაქალაქელები, მე ვარ გაბრაზებული. ამიტომაც, ჩემი წარმდგენი, პირველ რიგში, თქვენ, გაბრაზებული თბილისელები ხართ. მე ვარ გაბრაზებული თბილისელების მერობის კანდიდატი".

ერთიანმა ნაციონალურმა მოძრაობამ, ყოფილი ტელეწამყვანი, ზაალ უდუმაშვილი 26 ივნისს, აბანოთუბანში, კერძოდ, მეტეხის ეზოში წარადგინა თბილისის მერობის კანდიდატად. ლეგენდის თანახმად, საუკუნეების წინ, სწორედ ამ ტერიტორიაზე ჩავარდა გოგირდის ცხელ წყლებში ხოხობი, რომელზეც ნადირობდა მიმინო. ვახტანგ გორგასალს აღნიშნული ტერიტორია მოეწონა და ააშენა ახალი სატახტო ქალაქი.