ნეტფლიქსის ახალი მძაფრსიუჟეტიანი ფილმის Extraction 2-ის პრემიერამდე სულ რაღაც ერთი თვე რჩება. კინოსურათს მთელ მსოფლიოში მოუთმენლად ელოდებიან, თუმცა, ქართველი მაყურებლისთვის ნამუშევარი კიდევ უფრო საინტერესოა, რადგან მასში არაერთ ნაცნობ სახეს ვიხილავთ; ჰოლივუდურ ბლოკბასტერში კრის ჰემსვორტთან ერთად ქართველი მსახიობები მონაწილეობენ: თინათინ დალაქიშვილი, თორნიკე გოგრიჭიანი, დათო ბახტაძე, თორნიკე ბზიავა, ანდრო ჯაფარიძე, ირაკლი კვირიკაძე და სხვები.

Extraction 2-ის ახალი ტრეილერი ნეტფლიქსმა სულ ცოტა ხნის წინ გაავრცელა. მასში ქართველ მსახიობებს კიდევ ერთხელ მოვკარით თვალი.

ფილმში ქართველი მსახიობების მონაწილეობის შესახებ ჯერ კიდევ გასული წლის გაზაფხულზე შევიტყვეთ. მანამდე კი ისიც ვიცოდით, რომ Extraction 2-ში ქართველ ჰალკად წოდებულ მკლავჭიდელს, ლევან საგინაშვილს, ვიხილავდით.

აღსანიშნავია, რომ დათო ბახტაძისთვის ჰოლივუდურ ბლოკბასტერში მონაწილეობა უცხო გამოცდილება არ არის — მსახიობმა რამდენიმე წლის წინ ბენ-ჰურის ახალ ეკრანიზაციაში ითამაშა.

ფოტო: Netflix

Extraction 2-ის დიდი ნაწილი პრაღაში გადაიღეს. მართალია, თავიდან გადაღებები ავსტრალიაში იგეგმებოდა, თუმცა, კორონავირუსის პანდემიის გამო გეგმები შეიცვალა. ფილმის მეორე ნაწილში კრის ჰემსვორტის პერსონაჟი ცდილობს, ქართველი განგსტერებისგან დაიხსნას ოჯახი, რომელიც ციხეში ჰყავთ დატყვევებული.

რაც შეეხება Extraction-ის პირველ ფილმს, ენდი პარკსის გრაფიკულ რომანზე დაფუძნებული კინოსურათი 2020 წელს გამოვიდა და 99 მილიონზე მეტი ნახვით ნეტფლიქსის ყველაზე ყურებადი ორიგინალური ნამუშევარი გახდა.

Extraction 2-ის პრემიერა ნეტფლიქსზე 16 ივნისს შედგება.