ამის შესახებ რუსუდან თევზაძე ფეისბუქგვერდზე წერს.

რატომ არის მნიშვნელოვანი: თევზაძის თქმით, თეატრისა და კინოს უნივერსიტეტში 6 წელი მუშაობდა, კულტურის სამინისტრომ კი სრულიად უაპელაციოდ და მიკერძოებულად გადაწყვიტა, რომ ის აღარ უნდა იკავებდეს უნივერსიტეტის ადმინისტრაციის ხელმძღვანელის არჩევით პოზიციას.

  • "პრაქტიკულად უნივერსიტეტი თავისი თანამშრომლებიც აიყვანა მძევლად და დაიწყო გაცხოველებული ვაჭრობა ბიუჯეტის საკითხით. ცხადია, პერსონალურ ეგოს და პირად ინტერესს ვარჩიე ჩემი ძვირფასი კოლეგების ბედი და მივიღე გადაწყვეტილება შემეწყვიტა უნივერსიტეტთან საქმიანი ურთიერთობა", — ამბობს ის.

დეტალები: თევზაძე წერს, რომ ახალგაზრდების იმედგაცრუება სწორედ იქ იწყება, სადაც სახელმწიფო ფეხქვეშ თელავს და ღიად უპირისპირდება დემოკრატიულ ღირებულებებს და არაფრად აგდებს პიროვნების კომპეტენციას.

  • "არაფრად აგდებს ქვეყნისადმი უანგარო მსახურებას და პრიორიტეტად მხოლოდ კონკრეტულ პარტიულ კუთვნილებას მიიჩნევს".
  • "სამწუხაროა, მაგრამ უკვე ათწლეულებია, სახელმწიფო ინსტიტუციების მართვის მახინჯი ფორმა ძალაშია და მეტიც, ხშირ შემთხვევაში, ძირმომპალ ერთპარტიულ კომუნისტურ სისტემასაც კი უწევს კონკურენციას".

დღეს თევზაძემ მედიასთან განმარტა, რომ კულტურის მინისტრმა, თეა წულუკიანმა უნივერსიტეტის რექტორს პირადად უთხრა, რომ ის სამსახურიდან უნდა წასულიყო, წინააღმდეგ შემთხვევაში კი უნივერსიტეტის ბიუჯეტი არ გაიზრდებოდა.

  • "ბატონმა რექტორმა მე მითხრა, რომ რუსუდან, თუ შენ არ დატოვებ ამ თანამდებობას, უნივერსიტეტის ბიუჯეტი არ გაიზრდება".
  • უნივერსიტეტის რექტორმა ფორმულასთან ბრალდება უარყო და თქვა, რომ ასეთი საუბარი წულუკიანთან არ შემდგარა.
  • On.ge კულტურის სამინისტროსთან ცდილობს დაკავშირებას.