საქართველოს საპარლამენტო უმცირესობის, ევროპული საქართველოს წევრი, ელენე ხოშტარია ამბობს, რომ ქვეყანაში ადამიანის უფლებებისთვის ბრძოლის ერთადერთი ღირსეული გზა აქციაა. ასე გამოეხმაურა ხოშტარია ადამიანის უფლებათა დაცვის კომიტეტში ჟურნალისტების მიერ დაახლოებით ერთი საათის წინ გამართულ აქციას.

"ასეთი ტიპის აქციები ადამიანის უფლებების დაცვის კომიტეტის თავჯდომარე ეძახის შოუს იმის ნაცვლად რომ გვერდში დაუდგეს ამ ჯანსაღ პროტესტს. იმის ნაცვლად რომ დასვას კითხვები, რაც არის პარლამენტის პირველი ფუნქცია, უპირისპირდება ჟურნალისტებს. ეს არის ჩვენი ქვეყნის ადმიანის უფლებების დაცვის ფუნდამენტის პრობლემა. ეს არის ჩვენი საერთაშორისო იმიჯის პრობლემა. ასეთი რამეები ხდება მხოლოდ ველურ ქვეყნებში, სადაც სახელმწიფო არ არსებობს," - განაცხადა ხოშტარიამ.

მისი თქმით, საპარლამენტო უმრავლესობა ანგარიშვალდებულებას მხოლოდ საკუთარი პოლიტიკური გუნდის მიმართ გრძნობს.

"ცდილობენ მიჩქმალონ და გადაფარონ, გუნდის ინტერესები დაიცვან და არა ქვეყნისა სა საზოგადოების ინტერესი, რომ ასეთი რამეები არ ხდებოდეს," - განმარტა ხოშტარიამ.

საქართველოს პარლამენტის ადამიანის უფლებათა კომიტეტის სხდომაზე ჟურნალისტების აქცია სხდომის დაწყებიდან რამდენიმე წუთში გაიმართა. სხდომის დაწყებიდან რამდენიმე წუთში იქ მისულმა ჟურნალისტებმა თავზე პოლიეთილენის შავი პარკი ჩამოიფარეს და ასე გამოხატეს აფგან მუხტარლის მხარდასაჭერი პროტესტი.

სხდომაზე დასწრება ჟურნალისტებმა მას შემდეგ გადაწყვიტეს, რაც ამ კომიტეტის თავმჯდომარეს, სოფო კილაძესა და საქართველოს პარლამენტის თავმჯდომარეს, ირაკლი კობახიძეს შეხვედრის სურვილის შესახებ აცნობეს. ჟურნალისტებს მათგან პასუხი ამ დრომდე არ მიუღიათ.

29 მაისს, თბილისიდან გაუჩინარდა აზერბაიჯანის ხელისუფლების მიერ დევნილი ჟურნალისტი, აფგან მუხტარლი. მოგვიანებით გაირკვა, რომ ის აზერბაიჯანშია დაპატიმრებული, 31 მაისს კი, აზერბაიჯანის სასამართლომ მას სამთვიანი წინასწარი პატიმრობა შეუფარდა. საქართველოს შინაგან საქმეთა სამინისტრო ამ ეტაპზე მხოლოდ აზერბაიჯანელი კოლეგების მიერ მიწოდებულ ინფორმაციას აჟღერებს. აზერბაიჯანის ხელისუფლების ინფორმაციით, მუხტარლი საზღვრის უკანონო კვეთის გამო დააკავეს.