საერთაშორისო გამჭვირვალობა - საქართველო აცხადებს, რომ მთავრობის ინიციატივა აუცილებელი საზოგადოებრივი საჭიროებისათვის საკუთრების უფლების ჩამორთმევის შესახებ, ვერ უზრუნველყოფს საჯარო და კერძო ინტერესებს შორის ბალანსს. ამის შესახებ ინფორმაცია ორგანიზაციამ დღეს, 5 ივნისს გაავრცელა.

საერთაშორისო გამჭვირვალობა - საქართველოში მიიჩნევენ, რომ ცვლილებები უნდა ითვალისწინებდეს ე.წ.საპოლიცო გამოსახლების ინსტიტუტის შემოღების შემთხვევაში სხვა მესაკუთრეებისთვისაც იგივე შესაძლებლობით სარგებლობას. გარდა ამისა, ორგანიზაციაში მიაჩნიათ, რომ გათვალისიწინებული უნდა იყოს დაჩქარებული წესით განხილვის შესაძლებლობა.

"შენიშვნების გათვალისწინებით მიგვაჩნია, რომ წარმოდგენილი კანონპროექტი საჭიროებს დახვეწას, რათა თანაბრად იქნას დაცული ერთის მხრივ სახელმწიფოს, როგორც ექსპროპრიატორის, ასევე მოქალაქეთა საკუთრების უფლება. აუცილებელია საზოგადოებისათვის მნიშვნელოვანი პროექტების დაბრკოლებებისა და ხელშეშლის გარეშე განხორციელება, თუმცა მეორეს მხრივ გასათვალისწინებელია, რომ წარმოდგენილმა კანონპროექტმა მესაკუთრეთა კანონიერი ინტერესი სრული და სამართლიანი კომპენსაციის მიღებაზე სათანადოდ უნდა უზრუნველყოს," - აღნიშნავენ საერთაშორისო გამჭვირვალობა - საქართველოში.