შესაბამისი რეზოლუცია ევროპარლამენტმა დღეს მიიღო.

რატომ არის მნიშვნელოვანი: მასობრივმა შიმშილმა, ჰოლოდომორმა (Голодомор, შიმშილით სიკვდილი) 1932-33 წლებში 2 მილიონზე მეტი ადამიანის სიცოცხლე შეიწირა.

  • შიმშილობა გამოწვეული იყო საბჭოთა პოლიტიკით, რომელმაც კერძო მეურნეები იძულებით გააწევრიანა კოლექტიურ მეურნეობებში. არსებობს მოსაზრება, რომ ჰოლოდომორი ხელოვნურად იყო გამოწვეული უკრაინული ნაციონალიზმის ჩასახშობად.
  • უკრაინის უმაღლესმა რადამ ჰოლოდომორი უკრაინელი ხალის გენოციდად 2006 წელს აღიარა. 2008-2010 წლებში ევროკავშირმა და ევროპის საბჭომ ჰოლოდომორი კაცობრიობის წინაშე ჩადენილ დანაშაულად მიიჩნია.
  • ჰოლოდომორი არაერთ ქვეყანას აქვს აღიარებული, როგორც უკრაინელი ხალხის გენოციდი, მათ შორის, საქართველოს, აშშ-ს, კანადას და სხვა.

დეტალები: ევროპარლამენტარები კატეგორიულად გმობენ ქმედებებს, რომლებმაც მილიონობით უკრაინელის სიკვდილი გამოიწვია და მოუწოდებენ ყველა ქვეყანას, რომლებსაც ეს ჯერ არ გაუკეთებიათ, აღიარონ ჰოლოდომორი გენოციდად.

  • როგორც რეზოლუციაშია ნათქვამი, ტოტალიტარული საბჭოთა რეჟიმის გათეთრებამ, განდიდებამ და საბჭოთა დიქტატორის, იოსებ სტალინის კულტის აღორძინებამ განაპირობა ის, რომ რუსეთი დღეს არის ტერორიზმის სპონსორი სახელმწიფო.