8 ოქტომბერს ზელენსკიმ თქვა, რომ კონტრშეტევის შედეგად უკრაინამ 2 434 კვადრატული კილომეტრი და 96 დასახლებული პუნქტი დაიბრუნა.

რატომ არის მნიშვნელოვანი: 29 აგვისტოს უკრაინა შეტევაზე გადავიდა, ფრონტის ხაზზე წინ მიიწევს და წარმატებულად ათავისუფლეს დასახლებებს.

• ომის შემსწავლელი ინსტიტუტის განცხადებით, უკრაინის შეტევაზე გადასვლამ ომის მიმდინარეობა შეცვალა, თუმცა ბრძოლები 2023 წლამდე გაგრძელდება.
• მათივე თქმით, ფრონტის ხაზის სტაბილიზაციის შემდეგ, უკრაინის ჯარს ახალი შეტევების დაწყება მოუწევს.

დეტალები: უკრაინული მედიის ცნობით, უკრაინულმა არმიამ 1170კვ.მ-ზე მეტი გაათავისუფლა ხერსონის მიმართულებით.

• ოკუპანტების წარუმატებელი თავდასხმების შესახებ ისაუბრა უკრაინის გენერალურმა შტაბმაც.
• მათი ინფორმაციით, გასული დღის განმავლობაში უკრაინის შეიარაღებულმა ძალებმა მოიგერიეს მტრის თავდასხმები 9 დასახლების რაიონებში, მათმა თვითმფრინავებმა კი 30-ზე მეტი დარტყმა მიაყენეს მტერსა და მის აღჭურვილობას.
• უკრაინის სამხრეთის თავდაცვის ძალების ერთობლივი საკოორდინაციო პრესცენტრის ხელმძღვანელის, ნატალია გუმენიუკის განცხადებით, ოკუპანტები ძირითადად საჰაერო თავდასხმებზე არიან გადასულები, თუმცა საპასუხო დარტყმებს იღებენ უკრაინის მხრიდანაც.
• 9 ოქტომბერს, დილით უკრაინის საჰაერო ძალებმა სამხრეთ უკრაინაში ჩამოაგდეს რუსული თვითმფრინავი და კამიკაძე დრონი Shahed-136.
• უკრაინული საზღვაო ძალების მებრძოლებმა 31 დამპყრობელი, 3 ტანკი და 3 საავტომობილო ტექნიკა გაანადგურეს.

ყირიმის ხიდის აფეთქება: 8 ოქტომბერს ძლიერი აფეთქების შედეგად დაზიანდა ქერჩის ხიდიც, რომელიც კრემლის ოკუპაციის ერთგვარი სიმბოლოა. ის 2018 წელს ნახევარკუნძულის ანექსიის გამოცხადებიდან 4 წელში გახსნეს.

• "ეს არის ერთადერთი არტერია, რომელიც აკავშირებდა რუსეთსა და ოკუპირებულ ყირიმს და მასში გადიოდა სამხედრო მარაგის ძალიან დიდი მოცულობები[...] ხიდზე აფეთქება განსაზღვრას შემდეგ ეპოქას, რომელიც წინ უძღვის ყირიმის გათავისუფლებას", — ამბობს სამხედრო ექსპერტი, რომან სვიტანი.

დატყვევებული რუსი ჯარისკაცები მარცხს აღიარებენ. ერთ-ერთი მათგანი ყვება, როგორ ემზადებოდა ომისთვის 2 დღის განმავლობაში, როგორ იბრძოდა ხარკოვის რაიონში და როგორ დაამარცხეს მისი ოცეული უკრაინის შეიარაღებულმა ძალებმა 1 წუთში.

• მისი თქმით, რუსეთი გააგრძელებს "ხორცის მობილიზებას", რომელსაც ყოველგვარი მომზადების გარეშე ჩაყრის უკრაინაში.

გათავისუფლებულ რეგიონებში უკრაინელ მებრძოლებს სიხარულით ხვდებიან.

• დეოკუპირებულ ტერიტორიებზე უკრაინელები მასობრივ საფლავებსა და წამების საკნებს პოულობენ.
• წინასწარი ინფორმაციით, ლიმანში ორი სამარხი იპოვეს, მათგან ერთში მშვიდობიანი მოქალაქეების ცალკეული საფლავებია, რომელშიც, სავარაუდოდ, 200-მდე ცხედარია.
• 6 ოქტომბერს მასობრივი საფლავი იპოვეს ხარკოვში — მასში 534 ადამიანის ცხედარი იყო, მათ შორის, 19 ბავშვის; რეგიონის გათავისუფლებულ ტერიტორიაზე აღმოჩენილია წამების 22 საკანიც.
• ირპენის, ბუჩასა და სხვა ქალაქების შემდეგ, 447 ადამიანის ცხედრები აღმოაჩინეს ახალგათავისუფლებულ იზიუმშიც.

პარალელურად, რუსული პროპაგანდისტული მედია იუწყება, რომ უკრაინის წინსვლა შეჩერდა და რომ პუტინი "წარმატებულად აგრძელებს იმ ადამიანების დაცვას, რომლებიც კიევის რეჟიმის მიერ წლების განმავლობაში ბულინგსა და გენოციდს ექვემდებარებოდნენ".

• თუმცა, მხოლოდ გასულ ღამეს ზაპოროჟიეზე რუსი ოკუპანტების თავდასხმას 12 მშვიდობიანი მოქალაქე შეეწირა, 49 კი დაშავდა. მათ შორის 6 ბავშვია.