29 მაისს, შიდსით გარდაცვლილ ადამიანთა ხსოვნის პატივის მისაგებად გალერეა შარდენში 14-დან 18 საათამდე ცნობილი მხატვრებისა და სამხატვრო აკადემიის წარჩინებული სტუდენტების ნამუშევრების საქველმოქმედი გამოფენა-გაყიდვის აქცია გაიმართება.

საქველმოქმედო აქცია ლ. საყვარელიძის სახელობის დაავადებათა კონტროლისა და საზოგადოებრივი ჯანმრთელობის ეროვნული ცენტრის, შიდსით დაავადებულთა დახმარების ფონდის, შიდსის ცენტრის, თბილისის სამხატვრო აკადემიისა და ზიანის შემცირების საქართველოს ქსელის ორგანიზებით გაიმართება.

ორგანიზატორების განცხადებით, აქცია "აუსრულე სურვილი" აივ /შიდსთან მიმართებაში საზოგადოებრივი ცნობიერების და სოციალური პასუხისმგებლობის ამაღლების პირველი მცდელობაა. აქციის მიზანია დაანახოს საზოგადოებას, რომ მცირეოდენი დანახარჯებითა და ძალისხმევით შესაძლებელია ადამიანთა, განსაკუთრებით კი საზოგადოების მოწყვლადი ჯგუფების, სოციალური მდგომარეობის გაუმჯობესება და მათი საზოგადოებაში ინტეგრირება.

აქციის ფარგლებში შესაძლებელი იქნება მხარდაჭერის ჯგუფში გაერთიანება შიდსით დაავადებული და შიდსით დაობლებული ბავშვების რეგულარული მხარდაჭერისთვის.

გამოფენაში მონაწილეობას იღებენ: გიორგი გუგუშვილი, ქეთი მატაბელი, რუსუდან ფეტვიაშვილი, გია ბუღაძე, ზურა გომელაური, ნიკო ცეცხლაძე, მამუკა ცეცხლაძე, ლია შველიძე, ოლეგ ტიმჩენკო და სხვა.

აქციის ფარგლებში შეგროვებული თანხა გადაეცემა შიდსით დაავადებულთა დახმარების ფონდს, შიდსით დაავადებული და შიდსით დაობლებული ბავშვებისთვის, მათი საბაზისო საჭიროებების დასაკმაყოფილებლად.

საქართველოში რეგისტრირებულია აივ ინფექცია/შიდსის 6 360 შემთხვევა, მათ შორის 103 ბავშვია. რამოდენიმე ასეულს გადააჭარბა იმ ბავშვთა რიცხვმა, ვინც მშობლები შიდსის გამო დაკარგა.