სუს-ის ყოფილი მაღალჩინოსანი სოსო გოგაშვილი წერს, რომ ყოფილი მოსამართლის, ბესარიონ ალავიძის განცხადება მოსამართლეებზე ზეწოლის შესახებ სიმართლეა.

რატომ არის მნიშვნელოვანი: ბესარიონ ალავიძემ მოსამართლეებზე ზეწოლის შესახებ მთავარი არხის ეთერში ისაუბრა.

  • ალავიძე იმ ცხრა მოსამართლიდან ერთ-ერთია, რომელმაც 2017 წელს რუსთავი 2-ის საქმეზე გადაწყვეტილება გამოიტანა და ტელევიზია ქიბარ ხალვაშს მიაკუთვნა.

დეტალები: გოგაშვილი ჰყვება, როგორ ჩაერთო სუსი რუსთავი 2-ის საქმის მოსამართლეზე ზეწოლის პროცესში.

  • ამტკიცებს, რომ მოსამართლეზე ზეწოლა განახორციელა სუს-მა მიხეილ ჩინჩალაძის მოთხოვნის შემდეგ.
  • "მას შემდეგ, რაც მიხეილ ჩინჩალაძემ ალავიძეზე არაერთი ზეწოლის შემდეგ ვერ მიაღწია მიზანს მიეღო მისგან თანხმობა რუსთავი 2-ის საქმეზე ოცნებისთვის სასურველი გადაწყვეტილების შესახებ, მან საქმეში ჩართო მძიმე არტილერია";
  • როგორც გოგაშვილი წერს, ჩაინიშნა თათბირი ბიძინა ივანიშვილის ბიზნეს ცენტრში, სადაც საქმესი სუს-ის ჩართვა გადაწყდა;
  • "ჩვენ ივანიშვილისგან მივიღეთ შესაბამისი დავალება — ალავიძეზე სასურველი გადაწყვეტილების მისაღებად უნდა შეგვეთავაზებინა მუდმივი სამსახური, ფულადი პრემია და ხელშეუხებლობა";
  • "ეს ყველაფერი უნდა მომხდარიყო სახელმწიფო ინტერესებზე აპელირებით, უარის შემთხვევაში პრობლემების შექმნით".

გოგაშვილის განცხადებით, უწყებაში გამოიძებნა თანამდებობის პირი, რომელიც ალავიძეს დიდი ხანი იცნობდა და ჰქონდა კარგი ურთიერთობა — "მას დაევალა ალავიძესთან შეხვედრა და მისი დარწმუნება".

  • "შეხვედრა შედგა რამდენჯერმე, ხდებოდა ამ შეხვედრის აუდიო ჩაწერა, ოფიცერს ჩანაწერი მოჰქონდა ჩემთან და მე მას ვუგზავნიდი ჩინჩალაძეს".
  • გოგაშვილი წერილში მოუწოდებს შემსრულებელ ოფიცერს, რომელიც ისევ მუშაობს სუსში მაღალ თანამდებობაზე, ამხილოს სისტემა.

არქივიდან: 28 ივნისს უზენაესი სასამართლოს ყოფილმა მოსამართლემ, ბესარიონ ალავიძემ ქართული ოცნების დამფუძნებელ ბიძინა ივანიშვილს ღია წერილით მიმართა.

  • მოსამართლე ივანიშვილს წერდა, რომ ახლა აქვს შესაძლებლობა ისტორიაში შევიდეს, როგორც წინაპრების გზის გამგრძელებელი, რომლებსაც ევროპულ ოჯახში დაბრუნება და დამოუკიდებელი სასამართლოს დაფუძნება სურდათ.