სახალხო დამცველი TV პირველის ეთერში გასულ სიუჟეტს ეხმიანება.

რატომ არის მნიშვნელოვანი: 17 სექტემბერს TV პირველის ეთერში გავიდა სიუჟეტი სავარაუდო ფარული მიყურადებისა და თვალთვალის თაობაზე.

  • სიუჟეტში ნათქვამი იყო, რომ სახელმწიფო უსაფრთხოების სამსახურის მიერ ოპოზიციურ პარტიებში იყვნენ ჩანერგილი აგენტები, რომლებიც ოპოზიციურ ლიდერებს უთვალთვალებდნენ და მათ შესახებ ინფორმაციას სუს-ს აწვდიდნენ.

რას ამბობს სახალხო დამცველი: განცხადებაში აღნიშნულია, რომ მასობრივი უკანონო სახელმწიფო მიყურადება-თვალთვალის პირობებში შეუძლებელი ხდება ადამიანის უფლებების ჯეროვანი რეალიზება.

  • მისივე თქმით, სიუჟეტში წარმოდგენილი პირადი ცხოვრების მასშტაბური და ტოტალური კონტროლის ლეგიტიმური მიზანი შეუძლებელია არსებობდეს და გამართლდეს რამე სახელმწიფოებრივი ან საჯარო მიზნით.
  • "ცალკე აღნიშვნის ღირსია სახელმწიფო ორგანოების წარმომადგენელთა პოლიტიზების მასშტაბი, რომელიც გავრცელებულ ჩანაწერებში ნათლად იდენტიფიცირდება და სახელმწიფოს წარმომადგენელი კონკრეტულ პოლიტიკურ პარტიასთან აიგივებს თავს", — ამბობს ომბდსმენი.

სახალხო დამცველი მოუწოდებს, პროკურატურას, აწარმოოს ეფექტიანი გამოძიება მაქსიმალურად შემჭიდროებულ ვადებში და ყველა უფლებადარღვეული პირი დაზარალებულად ცნოს.

  • ის, ასევე, მოუწოდებს ყველა რელევანტურ პირს, მაქსიმალურად გამოიყენონ ადამიანის უფლებათა ევროპული სასამართლოსთვის მიმართვის მექანიზმი.
  • "ვთხოვთ ადამიანის უფლებათა ევროპულ სასამართლოს, პრიორიტეტულად განიხილოს საქართველოდან გაგზავნილი განაცხადები პირადი ცხოვრების თაობაზე, რომელიც ეხება ფარულ მიყურადებას", — აღნიშნულია განცხადებაში.

ფართო სურათი: სახელმწიფო უსაფრთხოების სამსახურს სიუჟეტთან დაკავშირებით განცხადება ჯერ კიდევ არ გაუვრცელებია.