ფრენკ ჰერბერტის სამეცნიერო ფანტასტიკის ჟანრის საკულტო წიგნის დიუნი ეკრანიზაცია 2021 წლის ერთ-ერთი მთავარი მოვლენა იყო კინოსამყაროში და 2023 წელსაც იმავეს განმეორებას უნდა ველოდოთ.

დენი ვილნევის ფილმი სხვა ყველაფერთან ერთად იმითაც იყო გამორჩეული, რომ მასში ერთმანეთზე უფრო კაშკაშა ვარსკვლავები მონაწილეობდნენ: ტიმოთი შალამე, ზენდეია, ჯეისონ მომოა, ოსკარ აიზეკი და სხვანი.

ისინი, ვისი პერსონაჟებიც პირველი ნაწილის სიუჟეტის დაუნდობელ განვითარებას გადაურჩნენ, ცხადია, მეორე ფილმშიც გამოჩნდებიან, თუმცა მათთან ერთად ვიხილავთ ახალ სახეებსაც, რომელთა ნაწილის ვინაობა უკვე ოფიციალურად არის გასაჯაროებული.

პირველი, ვინც დიუნის სამსახიობო გუნდს შეემატა, ლეგენდარული მსახიობი კრისტოფერ უოლკენი იყო, რომელიც იმპერატორის როლს მოირგებს და ამ ისტორიის მთავარი ანტიგმირი იქნება.

ფოტო: Foc Kan / WireImage

დიუნის მეორე ნაწილში ვიხილავთ მიდსომარის, პატარა ქალების და შავი ქვრივის ვარსკვლავს — ფლორენს პიუს, რომელიც პრინცესა ირულანს განასახიერებს.

ეს პერსონაჟი ამბის მთხრობელია: მის მიერ შემონახული ისტორიული ცნობებია გადმოცემული დიუნში, თუმცა ის წიგნში მხოლოდ ფინალში ჩნდება. შეგვიძლია ვივარაუდოთ, რომ ფლორენს პიუს ფილმში გაცილებით უფრო მეტი დრო დაეთმობა და პრინცესა ირულანსაც უკეთ გავიცნობთ.

ფოტო: Mike Marsland / Mike Marsland / WireImage

ოსტინ ბატლერი, რომელმაც სულ ახლახან ელვის პრესლის შესახებ გადაღებულ ბიოგრაფიულ დრამაში მთავარი როლი შეასრულა, ტიმოთე შალამეს პერსონაჟის, პოლ ატრეიდასის კიდევ ერთ მტერს, ბარონი ჰარკონენის ძმისწულს განასახიერებს, რომელთანაც პოლს გადამწყვეტი ბრძოლა ექნება.

ფოტო: Jon Kopaloff / Getty Images

პოლის დედის, ლედი ჯესიკას მსგავსად ლედი მარგოც ბენე გესერიტია. ეს პერსონაჟი იმპერატორის უახლოესი მეგობრის ცოლია, თუმცა მხარს ლედი ჯესიკასა და მის ოჯახს უჭერს და ფინალში მისი ჩართულობა გადამწყვეტი მნიშვნელობის იქნება.

სწორედ ამ პერსონაჟს განასახიერებს კიდევ ერთი პოპულარული მსახიობი — ლეა სეიდუ, რომელსაც მაყურებელი უკვე კარგად იცნობს ისეთი ფილმებით, როგორებიცაა ლურჯი ყველაზე თბილი ფერია, შუაღამე პარიზში და სიკვდილის დრო არაა.

ფოტო: Gareth Cattermole / Getty Images

დიუნის პირველი ნაწილის გამოსვლიდან მალევე ოფიციალურად დადასტურდა, რომ ფილმის მეორე ნაწილსაც ვიხილავდით. ცნობილია პრემიერის თარიღიც: 2023 წლის 20 ოქტომბერი.

პირველი ფილმის შემდეგ შეგვიძლია თამამად ვივარაუდოთ, რომ წინ არანაკლებ საინტერესო სანახაობა გველოდება და მოთმინებით დაველოდოთ მას.

ასევე იხილეთ: