პოლიტიკური პარტია გირჩი C.T.Park-ის წინააღმდეგ გამოდის და ხელისუფლებას კანონმდებლობის შეცვლას სთავაზობს, რომ კომპანიას "ხელ-ფეხი შეეკრას."

გირჩის განცხადებით, მთავრობასა და პარლამენტს არანაირი ვალდებულება არ გააჩნია C.T.Park-თან. ხელშეკრულების დარღვევაზე პასუხისმგებელია მხოლოდ თბილისის მერია. გირჩი მთავრობასა და ხელისუფლებას სთავაზობს, შეცვალოს 2 დებულება საქართველოს კანონმდებლობაში:

  • 150 ლარის ნაცვლად, საურავი გახდეს 20 ლარი ან ნული.
  • მანქანების გადაყვანა საჯარიმო ადგილზე არ მოხდეს მხოლოდ C.T.Park-ის გადაწყვეტილებით. ფაქტი, აფერხებს თუ არა მგზავრობას კონკრეტული ავტომანქანა, დაადგინოს პოლიციამ და მხოლოდ მას შემდეგ იყოს შესაძლებელი გადაყვანა საჯარიმო ადგილზე.

გირჩი C.T.Park-ს ყაჩაღს ადარებს, რომელიც იტაცებს ავტომობილებს, რომლებიც მოძრაობას არ აფერხებენ, რომელმაც იმის ნაცვლად, რომ ხელშეკრულების შესაბამისად, შეექმნა ახალი ადგილები, ქალაქის ტროტუარები აქცია საპარკინგე ადგილებად. გირჩის აზრით, კომპანია არ ითვალისწინებს სასამართლოს პრაქტიკას მასთან დაკავშირებით:

"ხშირად გვესმის, რომ მათ ძალიან არ მოსწონთ ეს ყაჩაღი, მაგრამ ვერაფერს უშვებიან, რადგან წინა ხელისუფლებამ მასთან გააფორმა რაღაცნაირი კონტრაქტი."

თითქმის ათი წელია C.T.Park თბილისში ოპერირებს და პარკირების საკითხების მოგვარება ევალება.