პოლონეთის პრეზიდენტის, ანდჟეი დუდას განცხადებით, მას შემდეგ, რაც რუსეთმა პოლონეთსა და ბულგარეთს გაზის მიწოდება შუწყვიტა, ისინი გაზპრომის წინააღმდეგ "სათანადო სამართლებრივ ნაბიჯებს" გადადგამენ.

BBC-ის ცნობით, დუდამ აღნიშნა, რომ კონტრაქტის დარღვევის გამო, გაზპრომისგან შესაბამის კომპენსაციას მოითხოვენ.

რაც შეეხება ბულგარეთს, ენერგეტიკის მინისტრმა, ალექსანდერ ნიკოლოვმა CNN-ს განუცხადა, რომ მთავრობა ღიაა მოსკოვის წინააღმდეგ სამართლებრივი შედეგების შესასწავლად.

რუსეთი პოლონეთსა და ბულგარეთს ბუნებრივი აირის მიწოდებას უჩერებს. ინფორმაცია დღეს, 27 აპრილს გახდა ცნობილი. ეს მას შემდეგ მოხდა, რაც რუსეთმა განაცხადა, რომ "არამეგობრულმა ქვეყნებმა" გაზის საფასურის გადახდა რუბლში უნდა დაიწყონ, რაზეც ბულგარეთმა და პოლონეთმა უარი თქვეს.

ევროკომისიის პრეზიდენტმა, ურსულა ფონ დერ ლაიენმა განაცხადა, რომ პოლონეთი და ბულგარეთი, რომლებსაც რუსეთმა გაზის მიწოდება შეუწყვიტა, ახლა გაზს იღებენ ევროკავშირის წევრი მეზობლებისგან. ლაიენის თქმით, გაზის მიწოდების შეწყვეტა კიდევ ერთი პროვოკაციაა კრემლისგან.