მარიუპოლიდან ქალებისა და ბავშვების ევაკუაციის პროცესი გეგმის მიხედვით ისევ არ განხორციელდა. დღეს ქალაქი 200-მდე სამოქალაქო პირს უნდა დაეტოვებინა, თუმცა, როგორც მერის მრჩეველი ამბობს, ოკუპანტებმა ჩაშალეს და მიზეზად "უკრაინელი ნაციონალისტების დაბომბვა" დაასახელეს.

"კიდევ ერთხელ რუსებმა ჩაშალეს ევაკუაცია. თავხედურად გამოიყენეს საკუთარი გეგმების ორგანიზებისთვის მარიუპოლის მაცხოვრებლების მცდელობა დაბრუნებულიყვნენ სახლში და უკრაინული არმიის პატიოსნება ცეცხლის შეწყვეტაზე", — აცხადებს ის.

როგორც უკრაინსკა პრავდა წერს, ევაკუაციის ადგილას შეკრებილ ბავშვებსა და ქალებს რუსი სამხედროები მიუახლოვდნენ და დაშლა უბრძანეს, მათ თქვეს, თითქოს დაბომბვა იწყებოდა. გამოცემის ინფორმაციით, ოკუპანტებმა ავტობუსები მიიყვანეს 200 მეტრში იმ ტერიტორიიდან, საიდანაც ევაკუაცია იყო დაგეგმილი და ხალხი სწრაფად ჩასვეს.

"მიუხედავად იმისა, რომ მარიუპოლის მცხოვრებლებს უკრაინის ხელისუფლების მიერ კონტროლირებად ტერიტორიაზე გადაყვანას დაჰპირდნენ, ოკუპანტებმა განაცხადეს, რომ ისინი მიჰყავდათ დაპყრობილ დოკუჩაევსკში. მგზავრებს ავტობუსებიდან გადმოსვლა აეკრძალათ", — წერს გამოცემა.

დღეს, 23 აპრილს უკრაინის ვიცე-პრეზიდენტმა, ირინა ვერეშჩუკმა განცხადა, რომ უკრაინული მხარის პარალელურად ოკუპანტები მეორე საევაკუაციო დერეფნის მოწყობას აპირებდნენ, რომლითაც ხალხის რუსეთში გაყვანას სურდათ. მან მოუწოდა მოსახლეობას, სიფრთხილე გამოეჩინათ.

ეს პირველი შემთხვევა არ არის, როდესაც რუსები მარიუპოლიდან ევაკუაციის პროცესს აბრკოლებენ. გარდა ამისა, მათ უკვე რამდენჯერმე სურვილის წინააღმდეგ გადაიყვანეს ხალხი რუსების კონტროლირებად ტერიტორიაზე, ან რუსეთში.

იმისთვის, რომ არ გამოგრჩეთ უკრაინაში მიმდინარე პროცესებთან დაკავშირებული სიახლეები, შემოგვიერთდით ჯგუფში — რა ხდება უკრაინაში