სპეციალური საგამოძიებო სამსახურის განცხადებით, საჩხერე-ჭიათურის პოლიციის განყოფილებიდან დაკავებულის გადმოხტომის ფაქტზე გამოძიება დაიწყეს.

"დათვალიერდა შემთხვევის ადგილი, აღებული იქნა შემდგომი კვლევისათვის საჭირო ნიმუშები, გამოიკითხა ინციდენტის თვითმხილველი საპატრულო პოლიციის თანამშრომლები, იდენტიფიცირებული იქნა სამეთვალყურეო და სამხრე ვიდეო კამერები. რის შედეგადაც სასამართლოს განჩინების საფუძველზე გამოთხოვილი იქნება გამოძიებისათვის საინტერესო აუდიო-ვიდეოჩანაწერები", — ნათქვამია განცხადებაში.

სპეციალური საგამოძიებო სამსახურის ცნობით, გამოძიება სისხლის სამართლის კოდექსის 342-ე მუხლის მე-2 ნაწილით მიმდინარეობს, რაც სამსახურეობრივ გულგრილობას გულისხმობს, რამაც მძიმე შედეგი — ჯანმრთელობის დაზიანება გამოიწვია.

მათივე თქმით, უწყება ყველა საჭირო პროცედურას შემჭიდროვებულ ვადებში ჩაატარებს. ამასთან, ისინი გამოძიებაში მოქალაქის ოჯახის წევრების ჩართულობას უზრუნველყოფენ. ~

როგორც ოჯახის წევრი TV პირველთან ამბობს, სლავა ცხადაძეს ჯერ სცემეს, შემდეგ კი მანქანაში ძალის გამოყენებით ჩასვეს.

"პატრულის მანქანას ფეხი მიარტყა, მერე გაულახიათ [...] ჩაუტენიათ მანქანაში [...] იქ მერე რა მოხდა არ ვიცი, ფანჯარაში გადახტაო და ეს ხელებშეკრული ბიჭი როგორ გადახტა მე არ ვიცი", — ამბობს ის TV პირველთან.

სოციალური სამართლიანობის ცენტრი სპეციალურ საგამოძიებო სამსახურს ორგანიზაცია მოუწოდებს პოლიციის მხრიდან ძალის სავარაუდო გადამატებაზე ეფექტიანი და დროული გამოძიება აწარმოოს. ორგანიზაციის თქმით, ისევ სისტემურ გამოწვევად რჩება, რომ პოლიციის მიერ ძალის გადამეტებაზე ეფექტიანი რეაგირება არ ხდება.