კულტურის მინიტრის, თეა წულუკიანის განცხადებით, ნაციონალური მოძრაობის ყოფნას არც პარლამენტში აქვს აზრი და არც დელეგაციაში, რომელიც უკრაინაში მიდის. მისი თქმით, არ აქვს მნიშვნელობა ენმ სად იქნება, რადგან "თავიანთი ადგილი" გარკვეული დროა აირჩიეს.

"ვხედავთ, რომ საპარლამენტო უმრავლესობა ოპოზიციასთან ერთად დელეგაციას ქმნის და მიემგზავრება კიევში, რაც, რა თქმა უნა, მისასალმებელია. უფრო მეტიც, ამ დელეგაციას სათავეში უდგას მაღალი თანამდებობის პირი და კონსტიტუციით ერთ-ერთი პირველი პირი, ბატონი შალვა პაპუაშვილი და ამ დელეგაციაში არ არის ომის პარტია.

ეს, რა თქმა უნდა, კარგია, მაგრამ რომ არ დაგიმალოთ, პრინციპში, არც აქვს მნიშვნელობა, ისინი სად იქნებიან, მათ თავიანთი ადგილი გარკვეული დროა, უკვე აირჩიეს. ვეღარ ერგებიან საქართველოში შექმნილ პოლიტიკურ მდგომარეობას, პარლამენტში შევიდნენ-არ შევიდნენ, ამაზე ძლივს ჩამოყალიბდნენ, მაგრამ გინდ ყოფილან პარლამენტში, გინდ არა, ეს არის ჩემი შეფასება მათი იქ საქმიანობისა და ამ დელეგაციაშიც იქნებიან თუ არა, ალბათ, არც ამას აქვს დიდი მნიშვნელობა", — თქვა მან იმედის ეთერში.

დღეს ნაციონალური მოძრაობის წევრმა, ხატია დეკანოიძემ განაცხადა, რომ დელეგაციაში, რომელიც უკრაინაში მიემგზავრება, მათი ფრაქციის წარმომადგენლები არ იქნებიან. დეკანოიძე დასძენს, რომ კიევში თავად აუცილებლად წავა.

ქართული ოცნების თავმჯდომარის, ირაკლი კობახიძის განცხადებით, უკრაინის მიმართ სოლიდარობა მრავალპარტიული ფორმით იქნება გამოხატული. ასევე, ამბობს, რომ ძალიან კარგია, რომ ვიზიტში ენმ მონაწილეობას არ მიიღებს.

შეგახსენებთ, რომ პაპაუაშვილმა გადაიფიქრა და უკრაინაში ვიზიტს გეგმავს. მისი თქმით, ქართული ოცნების წევრები შეთანხმდნენ, რომ უხერხულობისა და გაუგებრობის მოსაგვარებლად უკრაინაში ვიზიტი მნიშვნელოვან როლს შეასრულებს.

მანამდე, 8 აპრილს საქართველოში უკრაინის საქმეთა დროებითმა რწმუნებულმა, ანდრეი კასინოვმა განაცხადა, რომ რადას თავმჯდომარე ყველა პარლამენტარს, მათ შორის, შალვა პაპუაშვილს ბუჩაში იწვევდა, რათა საკუთარი თვალით ნახონ იქ ჩადენილი დანაშაულები. პაპუაშვილი ამბობდა, რომ რიგი "საკითხების განუმარტებლობის ფონზე, ოფიციალური მოწვევა არასათანადოდ ჩანდა.

"არის თუ არა სათანადო, "არასათანადო" უწოდო მეგობარ ქვეყანაში ჩასვლის მოწვევას, რომ დაინახო მისი უბედურება, გაიზიარო მისი მწუხარება, უთხრა მხარდამჭერი სიტყვები? მგონია, რომ მეგობარმა ეს უნდა გააკეთოს მოწვევის გარეშე", — ასე უპასუხა მაშინ უკრაინის რადას თავმჯდომარემ კოლეგას.

13 აპრილს პაპუაშვილსა და სტეფანჩუკს ონლაინშეხვედრა ჰქონდათ. პარლამენტის განცხადებით, ისინი შეთანხმდნენ, რომ გაუგებრობის თავიდან ასარიდებლად კომუნიკაცია მნიშვნელოვანია. იმავე დღეს რადას თავმჯდომარემ დაწერა, რომ საქართველოსა და უკრაინას შორის არსებული მცირე გაუგებრობები დასრულა. მისი თქმით, უკრაინაში დეპუტატების ვიზიტი დაადასტურებს ქვეყნებს შორის მეგობრულ ურთიერთობას.

ამავე თემაზე: