აშშ-ის ელჩის საქართველოში, კელი დეგნანის განცხადებით, უკრაინის დაზვერვის ბრალდებები რუსეთში კონტრაბანდის შეტანის ხელშეწყობაზე საქართველოსა და უკრაინის მთავრობებს შორის უნდა გადაწყდეს. ამის შესახებ მან ჟურნალისტებთან ისაუბრა.

"ეს სერიოზული ბრალდებებია და ამ საკითხს სჭირდება გარკვევა და ეს უნდა მოხდეს სამთავრობო არხების მეშვეობით, საქართველოსა და უკრაინის მთავრობებს შორის. საქართველოს მთავრობამ განაცხადა, რომ იგი არ მისცემს ამის საშუალება, რომ მოხდეს რაიმე მსგავსი დარღვევა", — თქვა მან.

დეგნანმა აღნიშნა სანქციების მნიშვნელობაზე და თქვა, რომ ამ საკითხში ერთიანობა მნიშვნელოვანია. მისი თქმით, ეს ომი პუტინმა დაიწყო და მასვე შეუძლია მისი დასრულება.

"ხშირად მესმის, რომ ამბობენ, არავის არ შეუძლია ამ ომის გაჩერებაო. რა თქმა უნდა, შესაძლებელია, პუტინს შეუძლია, იმიტომ, რომ მან დაიწყო ეს ომი. სანქციები არსებობს იმისთვის, რომ მოხდეს მასზე ზეწოლა და ეს უნდა იყოს თანმიმდევრული, ერთიანი და მას უნდა ემორჩილებოდეს ყველა, რომ ეს ზეწოლა განხორციელდეს და ჩვენ, რა თქმა უნდა, ამას დიდი ყურადღებით დავაკვირდებით", — აღნიშნა მან.

უკრაინის დაზვერვა აცხადებს, რომ რუსეთი ცდილობს საქართველოს ტერიტორიიდან კონტრაბანდული საქონლის შეტანას, რაშიც საქართველოს მთავრობა ხელს უწყობს. მათი ინფორმაციით, ქართულმა სპეცსამსახურებმა მიიღეს დავალება პოლიტიკური პირებისგან, არ ჩარეულიყვნენ ამ საკითხში.

პასუხად ფინანსთა სამინისტრომ განაცხადა, რომ ეს დაუსაბუთებელი და აბსურდული ბრალდებაა. უწყების თქმით, რუსეთისთვის სანქციების დაწესების დღიდან საქართველო ახორციელებს უმკაცრეს კონტროლს ქვეყნის ყველა საბაჟო პუნქტზე.

ქართული ოცნების თავმჯდომარემ, ირაკლი კობახიძემ კი უკრაინის განცხადებას ალოგიკური უწოდა. მან ამ შემთხვევაშიც ნაციონალური მოძრაობის როლზე ისაუბრა და თქვა, რომ ადამიანები, რომლებიც საქართველოში ოპოზიციაში არია, უკრაინის ხელისუფლების ნაწილი არიან.

ამავე თემაზე: