"ჩამოვედი, რომ მხარი დაგიჭიროთ თქვენ, თქვენს ხალხს იმ გზაზე, რომელიც ევროპისკენ და ნატოსკენ წაიყვანს საქართველოს" - ამ სიტყვებით მიესალმა სლოვაკეთის პრეზიდენტი, ანდრეი კისკა საქართველოს პრეზიდენტსა და ღონისძიებაზე დამსწრე საზოგადოებას და განმარტა, რომ საქართველომ ნაბიჯ-ნაბიჯ უნდა იაროს ევროპულ გზაზე.

კისკას განმარტებით, ის ჩამოვიდა იმისთვის, რომ ორ ქვეყანას შორის ურთიერთობას იმპულსი მისცეს. მან აღნიშნა, რომ თან ახლავს ბიზნესმენთა ჯგუფი, რომელთან ერთადაც დაათვალიერებს საქართველოს და მოიფიქრებს, როგორ უნდა განვითარდეს სლოვაკეთისა და საქართველოს ეკონომიკა:

"იქნება ეს ბიზნესი თუ ტურიზმი. ვიცით, რომ თქვენი კულტურული პროდუქტი არის საკმაოდ მაღალი პოტენციალის მქონე და იმედი მაქვს, რომ უამრავ პოზიტიურ სიურპრიზს შევთავაზებთ ორივე ჩვენს ქვეყანას".

კისკას განმარტებით, ძალიან მნიშვნელოვანია ის ფაქტი, რომ საქართველოსა და სლოვაკეთის ფართობი დაახლოებით ერთნაირია. მან ასევე ხაზი გაუსვა, თუ რაოდენ მნიშვნელოვანია ზოგადად ქვეყნისათვის ნატოში გაწევრიანება და გაიხსენა საკუთარი ქვეყნის მაგალითი:

"როდესაც ჩვენ გავხდით ნატოს წევრები, ჩვენი მშობლები ვერც კი იოცნებებდნენ ამის შესახებ, მაგრამ დღეს ეს რეალობაა".

სლოვაკეთის პრეზიდენტმა ასევე აღნიშნა, რომ საქართველო-ევროკავშირს შორის ასოცირების ხელშეკრულების გაფორმება ძალიან მნიშვნელობანია:

"ეს არის ის ბილიკი, რომელზეც თქვენ ნაბიჯ-ნაბიჯ, ერთადერთი მიმართულებით ივლით".

კისკას ასევე მიაჩნია, რომ საქართველოს ნატოს მომავალი სამიტისგან კარგი მოლოდინები უნდა ჰქონდეს:

"ბოლო სამიტის შემდეგ უამრავი რამ გაკეთდა. კერძოდ, ნატოს სამხედრო წვრთნები საქართველოში და იმედი მაქვს, რომ შემდეგ სამიტზე გაცილებით მეტ მხარდაჭერას მოიპოვებს ნატოსგან თქვენი ქვეყანა".

სლოვაკეთის პრეზიდენტმა ასევე განმარტა, რომ ის რეფორმები, რომლებსაც საქართველოს ნატოში გასაწევრიანებლად ახორციელებს, სლოვაკეთმაც განახორციელა, რამაც საბოლოო ჯამში პოზიტიური შედეგი გამოიღო:

"საქართველო არის ქვეყანა, რომელიც მდიდარია ისტორიული მემკვიდრეობით, ულამაზესი ბუნებით და საქართველოში გატარებული პირველივე საათების შემდეგ დარწმუნებული ვარ, რომ მე წავალ და თან გამყვება შთაბეჭდილებები იმ რეალობის შესახებ, რაც აქ დამხვდა".

სლოვაკეთის პრეზიდენტი, ანდრეი კისკა საქართველოს დღეს, 30 მაისს, პირველად ეწვია.