თბილისის საკრებულოს 35 მანქანა ემსახურება, ხოლო ლონდონის წარმომადგენლობით ორგანოს - არცერთი. ამის შესახებ ინფორმაციას ფლანგვის დეტექტორი ოფიციალურ დოკუმენტებზე დაყრდნობით ავრცელებს.

დიდი ბრიტანეთის დედაქალაქის მერი და საკრებულოს თანამშრომლები მანქანის მომსახურებით არ სარგებლობენ. დოკუმენტების თანახმად, ისინი ძირითადად საზოგადოებრივი ტრანსპორტით გადაადგილდებიან.

მერი და საკრებულო იყენებენ საზოგადოებრივ ტრანსპორტს: სასურველია, ყველამ გამოიყენოს საზოგადოებრივი ტრანსპორტი შესაძლებლობის მიხედვით. ტაქსი და კერძო მანქანა უნდა იქნას გამოყენებული, როცა საზოგადოებრივი ტრანსპორტი არ არის ხელმისაწვდომი ან პრაქტიკული.

ასე რომ, ლონდონის წარმომადგენლობითი ორგანო არ უზრუნველყოფს თავის წევრებს მანქანის მომსახურებით.

ფოტო: ფლანგვის დეტექტორი

ლონდონის გზა ჯამურად 14 794 კმ-ს შეადგენს, მაშინ როდესაც მთელი საქართველოს ქალაქებისა და სოფლის გზა 13 446 კმ-ს მოიცავს. ლონდონის მოსახლეობის რაოდენობა - 8,63 მილიონი ადამიანი, რამდენჯერმე აღემატება თბილისისა და მთლიანად საქართველოს პოპულაციას.

გაცილებით უფრო დიდი მასშტაბებისა და ფინანსური რესურსების მიუხედავად, ლონდონის საკრებულოს წევრები პირადი ავტომობილების გარეშე ახერხებენ სამსახურეობრივი საქმიანობის შესრულებას, თბილისელი კოლეგებისგან განსხვავებით.

ასევე, 2016 წელს, თბილისის საკრებულოს ბალანსზე არსებული მანქანების შენახვა ბიუჯეტს 104 396 ლარი დაუჯდა.

"ფლანგვის დეტექტორი" არასამთავრობო ორგანიზაცია "მმართველობის მონიტორინგის ცენტრის" მედია პროექტია.