14 იანვარს ავსტრალიის ღია პირველობაზე საასპარეზოდ ჩასულ ნოვაკ ჯოკოვიჩს ქვეყანამ ვიზა ხელმეორედ გაუუქმა, რისი მიზეზიც აუცრელობა გახდა. ვიზის გაუქმების შემდეგ მსოფლიოს ამჟამინდელ პირველ ჩოგანს ორი გზა ჰქონდა: ან დეპორტაციას უნდა დათანხმებოდა, ან გადაწყვეტილება გაესაჩივრებინა. მან გადაწყვეტილება გაასაჩივრა, თუმცა სასამართლო დავა წააგო. ნოვაკ ჯოკოვიჩს ავსტრალიიდან გააძევებენ.

ნოვაკ ჯოკოვიჩს პირველი მატჩი 17 იანვარს უნდა ეთამაშა, თუმცა ამას ვეღარ მოახერხებს. ჯოკოვიჩმა განაცხადა, რომ გადაწყვეტილებით იმედგაცრუებულია, თუმცა მას დაემორჩილება.

ყველაფერი იქიდან დაიწყო, რომ 6 იანვარს ავსტრალიაში ჩაფრენილი ჩოგბურთელი ქვეყანაში აუცრელობის გამო არ შეუშვეს: ჯოკოვიჩი მანამდე აცრის შესახებ თავის სტატუსზე საჯაროდ არ საუბრობდა, მაგრამ მოგვიანებით ავსტრალიის სახელმწიფო წარმომადგენლებმა დაადასტურეს, რომ მას კორონავირუსის საწინააღმდეგო ვაქცინა გაკეთებული არ ჰქონდა.

თავდაპირველად ჯოკოვიჩმა სასამართლო დავა მოიგო: მოსამართლემ პროცედურული ხარვეზების გამო უკანონოდ ცნო ვიზის გაუქმების შესახებ გადაწყვეტილება, რადგან სპორტსმენს სათანადო დრო არ მიეცა, რომ ვიზის გაუქმების საკითხზე თავისი პოზიციის დაცვა შესძლებოდა.

14 იანვარს ჯოკოვიჩს ვიზა ხელმეორედ გაუუქმეს. ავსტრალიის იმიგრაციის მინისტრის განმარტებით, მან თავისი გადაწყვეტილება "საზოგადოების საკეთილდღეოდ" მიიღო, რაც იმით აიხსნება, რომ ჯოკოვიჩის მაგალითმა შესაბამისი გავლენა უნდა იქონიოს იმ სხვა პოტენციურ არავაქცინირებულ პირებზე, რომლებიც ავსტრალიაში ჩასვლას დააპირებენ.

ავსტრალიაში არავაქცინირებული პირების შესვლა აკრძალულია, თუმცა ჯოკოვიჩს კორონავირუსი 16 დეკემბერს დაუდასტურდა და სამედიცინო პერსონალის გარკვეული რეკომენდაციის საფუძველზე აპირებდა, რომ ავსტრალიის ღია პირველობას აცრის დამადასტურებელი დოკუმენტის გარეშე დასწრებოდა. თუმცა მოგვიანებით ისიც გაირკვა, რომ მან სერბეთში დაარღვია თვითიზოლაციის წესები.

ამავე თემაზე: