კოსმეტიკა და თავის მოვლის საშუალებები გლობალურად ერთ-ერთი ყველაზე გაყიდვადი პროდუქტია, რომლის პოპულარიზაციასაც ხელი Instagram-მა და ინფლუენსერებმა შეუწყვეს. არაერთი ცნობილი ადამიანი მოხვდა Forbes-ის რეიტინგში კოსმეტიკური ხაზის საშუალებით, რომელთა ქონებაც მილიარდებს აჭარბებს. საქართველოში თავის მოვლის საშუალებების მასშტაბური წარმოება ნაკლებ აქტუალურია და დარგიც ჩანასახის ეტაპზეა, თუმცა არანაკლებ პოპულარულია მცირე და საშუალო ზომის მეწარმეების მიერ შექმნილი ხელნაკეთი პროდუქტი.

საპონერია სწორედ ერთ-ერთი მათგანია, რომელიც ბუნებრივი ინგრედიენტებით დამზადებულ, ხელნაკეთ და ორგანულ სპა საშუალებებს ამზადებს. როგორც მისი დამფუძნებელი, ანნა კაჭკაჭიშვილი გვიყვება, პროდუქტი დიდი ხანია პოპულარობით სარგებლობს მომხმარებლებში და კორპორატიული კლიენტებიც მრავლად არიან, თუმცა პანდემიამ ყველაფერი დროებით გააჩერა. Shark Tank-ამდე საპონერიას პროდუქტის რეალიზება მხოლოდ ონლაინ, სოციალური ქსელების საშუალებით ხდებოდა, თუმცა ინვესტორების დახმარების შემდეგ ანნა მაღაზიის გახსნას, სავაჭრო მოლებში არაერთი სტენდის განთავსებას და წარმოების გაზრდას გეგმავს.

"გაზაფხულზე ვიფიქრე, რომ მსურდა მსგავსი ტიპის ბიზნეს შოუში მონაწილეობა, თუმცა მაშინ Shark Tank-ის შესახებ ჩემთვის ცნობილი არ იყო. შესარჩევ ტურზე აგვისტოში გავიგე, მაშინვე გადავიღე 1 წუთიანი ვიდეო და ყველა ეტაპი წარმატებით გადავლახე. მაშინ ვერც კი წარმოვიდგენდი, ასეთი წარმატებული თუ იქნებოდა აქ მოხვედრა. სიმართლე გითხრათ, ბიზნესთან დაკავშირებული ბევრი საკითხი არ მესმოდა, მათ შორის: მარკეტინგი, ფინანსები, PR და ა.შ. პანდემიის პერიოდი სწორედ მათი შესწავლისთვის გამოვიყენე. გამიმართლა და როცა პროექტში მოვხვდი, უკვე ყველანაირად მომზადებული ვიყავი", — გვიყვება ანნა.

მისი თავდაპირველი შეთავაზება 20%-იანი წილის სანაცვლოდ 40,000 ლარი იყო. მოლაპარაკების შედეგად, სოსო ფხაკაძე 50%-იანი წილის შეძენას დათანხმდა. ერთი შეხედვით, ყველაფერი გადაწყვეტილი იყო, თუმცა ბოლო მომენტში მენი ბენეშმა საპონერიას დამატებით 40,000 ლარი შესთავაზა და შედეგად კომპანიას უკვე 2 Shark ყავს, რომელთა მფლობელობაშიც 25-25%-იანი წილები იქნება.

"თანხასთან ერთად ინვესტორები საკუთარ გამოცდილებას და ცოდნას შემომთავაზებენ, რაც კონკურენტებთან ძალიან დიდ უპირატესობას მომცემს. ვფიქრობ, თავდაპირველად 10 ადამიანს დავასაქმებთ და წარმოებასაც მნიშვნელოვნად გავზრდით, შემდეგ კი დავაკვირდებით გაყიდვებს", — ამბობს ანნა.

მთავარი, რითიც Shark-ები დაინტერესდნენ, მშრალი ტექნოლოგიით დამზადებული შამპუნია, რომელიც საქართველოში ინოვაციურ პროდუქტს წარმოადგენს. ანნას თქმით, ის დაახლოებით სამჯერ უფრო ხარჯეფექტიანია ჩვეულებრივ შამპუნთან შედარებით, გამოსაყენებლად მარტივია და ნატურალური ინგრედიენტებითაა დამზადებული.

"პროექტის წარმატებაში დარწმუნებული ვარ. მჯერა საკუთარი პროდუქტის და დიდი იმედი მაქვს ის მომხმარებელსაც მოეწონება", — გვიყვება ანნა.

როგორც დასაწყისში აღვნიშნეთ, ნატურალური თავის მოვლის საშუალებები მთელს მსოფლიოში ძალიან პოპულარულია. კერძოდ, Ipsnews-ის მიხედვით გლობალური ბაზრის ზომამ 2019 წელს $24.5 მილიარდი შეადგინა, საშუალოდ 4.5%-იანი ზრდის შედეგად კი 2025 წელს ეს რიცხვი 30 მილიარდ დოლარს გადააჭარბებს. რამდენად გამართლდება ანნას იმედები და გაართმევს თუ არა თავს მენეჯმენტთან ერთად წარმოების გამოწვევებს, ამას დრო გვიჩვენებს, თუმცა ახლა უკვე მის გვერდით მრავალწლიანი გამოცდილების მქონე Shark-ები, სოსო ფხაკაძე და მენი ბენეში იქნებიან, რაც წარმატების შანსებს მნიშვნელოვნად გაზრდის.

შეგახსენებთ, საქართველოს პირველ არხზე შარქ თენქ საქართველოს გენერალური პარტნიორი საქართველოს ბანკია. SONY Pictures-ის რეალითი შოუ — Shark Tank ერთ-ერთი ყველაზე პოპულარული შოუა, რომელმაც 5 კონტინენტი მოიცვა. ის უკვე 13 სეზონია მაყურებლების ერთ-ერთ ფავორიტ გადაცემად რჩება. 4 ემის მფლობელი შოუ საქართველოს სატელევიზიო სივრცეში პირველად გადის.