გრეის ანატომიის მსახიობმა ელენ პომპეომ ამ ეტაპზე არ იცის, თუ როგორ დასრულდება თავისი პერსონაჟის, მერიდით გრეის, ისტორია, თუმცა სურს, რომ ეს მაყურებელმა ძალიან მალე გაიგოს.

"ვცდილობ, ყველა დავარწმუნო, რომ უკვე შოუს დასრულების დროა", — ამბობს მსახიობი და თან აღნიშნავს, რომ ეს საკმაოდ რთულია იმის გათვალისწინებითაც კი, რომ სერიალი ორი ათწლეულის განმავლობაში ძალიან პოპულარული იყო.

"თავს გულუბრყვილოდ ვგრძნობ, როცა ვამბობ, რომ შოუ აღარ უნდა გაგრძელდეს, რადგან ამაზე ძირითადი პასუხი ასეთია: "ვის აინტერესებს, ელენ? ასე ხომ უამრავ ფულს გამოვიმუშავებთ". ამ ხალხის გადარწმუნება კი რთულია", — ამბობს მსახიობი.

ფოტო: ABC

მიუხედავად იმისა, რომ მსახიობისთვის შოუ მე-18 სეზონით ბუნებრივ დასასრულს უახლოვდება, ის ცდილობს, რომ მერიდით გრეის გზა სერიალის მიღმაც გააგრძელოს. როცა პანდემია დაიწყო, ელენ პომპეომ გადაწყვიტა, რომ კრიზისთან გამკლავებაში სხვებს დახმარებოდა და მან წამოიწყო საუბრების სერია, სახელად Healing Healthcare.

პროექტის ფარგლებში პომპეო ჯანდაცვის მუშაკებთან ერთად ისეთ თემებზე საუბრობს, როგორებიცაა "ჯანდაცვის გამოწვევები" და "რასიზმი ჯანდაცვის სფეროში". ამ საუბრების მიზანია, რომ ყველამ მოისმინოს, თუ რას განიცდიან და რა პირობებში უწევთ მუშაობა ჯანდაცვის მუშაკებს. პომპეოს მიზანია, რომ ჯანდაცვა ყველასთვის ხელმისაწვდომი იყოს სქესის, ეთნიკური წარმავლობის, გეოგრაფიული მდებარეობისა და სოციალურ-ეკონომიკური სტატუსის მიუხედავად.

ფოტო: ABC

პომპეომ, რომელიც გრეის ანატომიის ერთ-ერთი პროდიუსერიცაა, Insider-თან ინტერვიუში განაცხადა, რომ სერიალი დრამის კატეგორიას კი მიეკუთვნება, მაგრამ უთანასწორობაზეც ამახვილებს ყურადღებას, რომელიც ჯანდაცვის სისტემისთვის დღემდე მთავარი გამოწვევაა. ამის დასტურად, მსახიობმა გრეის ანატომიდან ის ეპიზოდი გაიხსენა, როცა მერიდითი ცდილობს ახალგაზრდა ქალს, რომელსაც დაზღვევა არ აქვს, კიბოს მკურნალობაში დაეხმაროს.

ასე რომ, ელენ პომპეო ჯანდაცვასთან დაკავშირებული პრობლემების მოგვარებას ყველა შესაძლო გზით ცდილობს. "როგორც კი შესაძლებლობა დავინახე, მაშინვე გადავწყვიტე იმ სტარტაპის ნაწილი გავმხდარიყავი, რომელიც რეალურ პრობლემებს საჯაროდ განიხილავს", — ამბობს მსახიობი Healing Healthcare-ის შესახებ.