2021 წელს მსოფლიოში კინომოყვარულების ორი ყველაზე დიდი ფანდომი თავიანთი საკულტო ფილმების გამოსვლიდან 20 წლისთავს აღნიშნავს. ზუსტად ორი ათწლეულის წინ ჰარი პოტერის და ბეჭდების მბრძანებლის სერიების პირველმა ფილმებმა დღის სინათლე იხილეს. უკვე ვიცით, პოტერიადის შემქმნელები რასაც აპირებენ ამ განსაკუთრებული იუბილეს აღსანიშნავად, მაგრამ რა მოგვიმზადეს LOTR-ის ვარკვლავებმა? არც მეტი, არც ნაკლები, რეპი.

ცნობილმა ამერიკელმა ტელეწამყვანმა, სტივენ კოლბერმა, თავის გადაცემაში ბეჭდების მბრძანებლის ვარსკვლავები გააერთიანა. ელაიჯა ვუდი, შონ ესტინი, ბილი ბოიდი, დომინიკ მონაჰენი, ორლანდო ბლუმი, ჰუგო უივინგი და ენდი სერკისი მხოლოდ იმიტომ შეიკრიბნენ, რომ პიანისტ ჯონ ბატისტთან და გადაცემის წამყვანთან ერთად გაერეპათ და ასე განეცხადებინათ, რომ ბეჭდების მბრძანებელი ისევ N1 ტრილოგიაა.

ბეჭდების მბრძანებლის პირველი ფილმი, ბეჭდის საძმო, 2001 წლის 19 დეკემბერს გამოვიდა. მომდევნო წლებში მას გაგრძელებებიც მოჰყვა: ორი ციხე-კოშკი და მეფის დაბრუნება. ამ უკანასკნელმა 11 ოსკარი მიიღო და კინოაკადემიის ჯილდოების რაოდენობით ბენ-ჰურსა და ტიტანიკს გაუტოლდა.

2022 წელს ტოლკინის ეპიკური ისტორიის მიხედვით გადაღებული სერიალიც გამოვა, რომელიც Amazon-მა გადაიღო და გავრცელებული ცნობების მიხედვით, აქამდე გადაღებულ სერიალებს შორის ყველაზე მასშტაბური პროექტია მასზე დახარჯული $465 მილიონით.

ასევე იხილეთ: