ქალაქ რუსთავის თეატრის სამხატვრო ხელმძღვანელის პოსტზე ნანუკა ხუსკივაძე აირჩიეს.

ქალაქ რუსთავის მერიამ გიგა ლორთქიფანიძის სახელობის რუსთავის მუნიციპალური თეატრის სამხატვრო ხელმძღვანელის თანამდებობის დასაკავებლად კონკურსი 16 მარტს გამოაცხადა. 6 კანდიდატიდან სარეკომენდაციო საბჭომ, წარმოდგენილი დოკუმენტაციის საფუძველზე, 1 კანდიდატი უკვე შეარჩია და დასამტკიცებლად მერს წარუდგენს.

კონკურსში მონაწილეობას 6 კანდიდატი გოგა თავაძე, მაია შენგელია, ეკა კვირკველია, ნუკრი არჩვაძე, ლალი ნიკოლაძე და ნანუკა ხუსკივაძე იღებდა.

სამხატვრო ხელმძღვანელს სპეციალურად შერჩეული კომისია ირჩევდა, რომლის წევრებიც თეატრმცოდნეები - მაკა ვასაძე, ანანო მირიანაშვილი, გუბაზ მეგრელიძე და ლაშა ჩხარტიშვილი იყვნენ, ასევე მსახიობები ნინო კასრაძე და ზურა შარია.

"ნანუკას ყველაზე რეალური, დახვეწილი, თანმიმდევრული, კონკრეტული და გაწერილი პროგრამა ჰქონდა. თან მისი პიროვნული თვისებებიც გავითვალისწინეთ, რომელიც მგონია რომ სჭირდება სამხატვრო ხელმძღვანელს რათა მოახდინოს გახლეჩილი დასის კონსოლიდაცია. ნანუკას აქვს ავტორიტეტი, რაც სჭირდება სამხატვრო ხელმძღვანელს განსაკუთრებით რეგიონის თეატრში სპონსორების მოსაზიდად", - უთხრა On.ge-ს კომისიის ერთ-ერთმა წევრმა, თეატრმცოდნე ლაშა ჩხარტიშვილმა.

თეატრის სამხატვრო ხელმძღვანელის თანამდებობაზე პირველი კონკურსი იანვარში გამოცხადდა, თუმცა მალევე ჩაიშალა და მეორე კონკურსი უკვე მარტის თვეში გამოცხადდა.

ნანუკა ხუსკივაძე რუსთავის თეატრში მისი კონკურსში ოფიციალურად გამარჯვებულად დასახელების შემდეგ მივა, რამდენიმე დღეში მსახიობს და რეჟისორს ქალაქის მერი სამხატვრო ხელმძღვანელის თანამდებობაზე ოფიციალურად დანიშნავს.