ვალდებულების მიუხედავად, ავტოსადგურების ადმინისტრაციები არ ამოწმებენ საქალაქთაშორისო ტერიტორიებზე მოძრავ სამარშრუტო ტაქსებს. ამის შესახებ ნათქვამია კვლევაში, რომელიც კავკასიის კვლევითი რესურსების ცენტრმა ჩაატარა. ორგანიზაციის ცნობით, კანონში ნათლად არაა მოცემული, რა ფორმით უნდა განხორციელდეს მონიტორინგი.

კვლევის თანახმად, მართალია, ქართული კანონმდებლობით M2 და M3 კატეგორიის ავტოტრანსპორტის ტექნიკური შემოწმება სავალდებულოა, მაგრამ მძღოლების, მგზავრებისა და ავტოსადგურების მენეჯერების თქმით, ტრანსპორტის გაუმართაობა ერთ-ერთი მნიშვნელოვანი პრობლემაა. დაკვირვების შედეგად CRRC-მ დაადგინა, რომ:

  • სამარშრუტო ტაქსების 4%-ს მგზავრობისას მძღოლების მიერ შეკეთება დასჭირდა;
  • 4%-ს მექანიკური დაზიანება აღენიშნებოდა, რის გამოც მგზავრობის ზოგიერთ მონაკვეთზე, სამარშრუტო ტაქსების შიდა სალონში დამწვრის სუნი იგრძნობოდა;
  • 23%-ს სულ მცირე, ერთი ფანჯარა მაინც ჰქონდა დაზიანებული;
  • 10%-ში ისეთი სკამები იყო დამონტაჟებული, რომლებიც ავტომობილის შიდა სალონის იატაკზე არ იყო მიმაგრებული

რაოდენობრივი კვლევის მიხედვით, სამარშრუტო ტაქსების ტექნიკური გაუმართაობის მთავარი მიზეზი შეკეთების მაღალი ფასია.

CRRC-ის ცნობით, მძღოლები ტექნიკური დათვალიერების მნიშვნელობას აღიარებენ. მათთან ერთად, რეგულაციების შემოღების აუცილებლობას ავტოსადგურის ადმინისტრაციაც ემხრობა, თუმცა სამარშრუტო ტაქსები რეისში გამგზავრების წინ მაინც არ მოწმდებიან.

კავკასიის კვლევითი რესურსების ცენტრი მიიჩნევს, რომ

  • კანონი ცალსახად უნდა განსაზღვრავდეს გამგზავრებამდე სავალდებულო შემოწმების ფორმას;
  • ავტოსატრანსპორტო საშუალებების ტექნიკური დათვალიერებისთვის შერჩევა შემთხვევითი პრინციპით უნდა მოხდეს.