ნაციონალური მოძრაობის ერთ-ერთი ლიდერის, ხატია დეკანოიძის თქმით, ქუთაისში ელექტროენერგიას აქრობენ. ენერგო პრო ჯორჯიაში კი აცხადებენ, რომ შუქი მხოლოდ ერთ უბანზე გაითიშა.

როგორც On.ge-ს კომპანიაში განუცხადეს, ავარაია არა მათ, არამედ, სავარაუდოდ, საარჩევნო უბნის შიდა ქსელში მოხდა. მათივე თქმით, ადგილზე სარეაბილიტაციო სამუშაოები უკვე მიმდინარეობს.

"ჩვენს ქსელში არ მომხდარა ავარია, სავარაუდოდ, დიდი ალბათობით, საარჩევნო უბნის შიდა ქსელში მოხდა ესეთი რაღაცა ავარია. თუმცა, ენერგო პრო ჯორჯიას სამსახური იყო რა თქმა უნდა, უკვე მისულია ადგილზე და დაეხმარებიან სარეაბილიტაციო სამუშაოებში", — აცხადებენ კომპანიაში.

აღსანიშნავია, რომ დეკანოიძემ საარჩევნო უბნებზე შუქის ჩაქრობის შესახებ განცხადება თვითმმართველობის არჩევნების პირველ ტურზეც გააკეთა, რაზეც კომპანიაში ამბობდნენ, რომ ელექტროენერგია ავარიულად გამორთული მხოლოდ 20 წუთის განმავლობაში იყო.

დღეს, 30 ოქტომბერს ადგილობრივი თვითმმართველობის არჩევნების მეორე ტური იმართება. მერი 15 თვითმმართველ თემსა და 5 თვითმმართველ ქალაქში, მათ შორის, თბილისში ირჩევა. გარდა ამისა, მეორე ტური გაიმართება 24 საარჩევნო ოლქში, რომლის შედეგად აირჩევა 42 მაჟორიტარი.