თურქეთის მთავრობა სოციალურ ქსელებში ბანანის ჭამის "პროვოკაციული" კადრების გავრცელების გამო სულ მცირე შვიდი სირიელი ლტოლვილის დეპორტაციას გეგმავს. ეს გადაწყვეტილება მას შემდეგ მიიღეს, რაც თურქეთის მოქალაქემ დაიჩივლა, რომ ლტოლვილებისგან განსხვავებით, მას ბანანის ყიდვის საშუალება არ აქვს.

"თქვენ ჩემზე კომფორტულად ცხოვრობთ. მე ბანანის ჭამის საშუალება არ მაქვს, თქვენ კი კილოგრამობით ბანანს ყიდულობთ", — ასე მიმართავს თურქი კაცი სირიელ სტუდენტს ვიდეოში, რომელიც 17 ოქტომბერსაა გადაღებული. ამ დავას თურქი ქალიც შეუერთდა, რომელიც სირიელ მიგრანტებს საყვედურობს, სახლის დაბრუნებისთვის ბრძოლის ნაცვლად, თურქეთში მდიდრულად ცხოვრობთო. სირიელი სტუდენტი კი მათ ეუბნება, რომ სხვაგან წასასვლელი არსად აქვს.

Bloomberg-ის ინფორმაციით, დაახლოებით 4 მილიონი სირიელი, რომლებიც საკუთარი ქვეყნიდან სამოქალაქო ომს გამოექცნენ, თურქებთან ერთად რამდენიმე წელი მშვიდობიანად ცხოვრობდნენ. თუმცა ბოლო პერიოდში ანტიმიგრანტული განწყობა იზრდება და პოლიციამ ათეულობით ადამიანი დააკავა, რომლებიც მიგრანტებს თავს დაესხნენ და ეს შემთხვევები სირიელების გარდაცვალებით დასრულდა.

"სოციალურ ქსელებში გავრცელებული პროვოკაციული ჩანაწერების გამო უცხო ქვეყნის შვიდი მოქალაქის წინააღმდეგ გამოძიება მიმდინარეობს და მათი დეპორტაციის საკითხი განიხილება", — განაცხადა თურქეთის მიგრაციის საკითხების განმკარგავი ორგანოს წარმომადგენელმა.