უკვე რამდენიმე დღეა, რაც მსოფლიოში უამრავი ფანისა და გამოცემის განსაკუთრებული ყურადღება ანჯელინა ჯოლისკენაა მიმართული. თავისი მონაწილეობით გადაღებული ფილმის, Eternals-ის, სხვადასხვა ქალაქში გამართულ პრემიერაზე ამერიკელი კინოვარსკვლავი შვილებთან ერთად ჩნდება ხოლმე. თუმცა, ამას წინათ, ლოს-ანჯელესში გაშლილ წითელ ხალიჩაზე ჯოლის "დელეგაციამ" იმითაც მიიქცია ყურადღება, რომ მსახიობის ერთ-ერთ შვილს, ზაჰარას, დედის ძველი კაბა ეცვა, რომლითაც ანჯელინა 2014 წელს ოსკარების დაჯილდოებაზე გამოჩნდა. ანჯელინას კაბა მოირგო თავისმა კიდევ ერთმა შვილმა, შაილო ჯოლი-პიტმაც.

15 წლის შაილომ ეს ერთგვარი ტრადიცია უკვე გაერთიანებულ სამეფოში გამართულ კინოპრემიერაზე გააგრძელა. ლონდონურ ღონისძიებაზე იგი Dior-ის იმ კაბით მივიდა, რომელიც ორი წლით ადრე ანჯელინას ეცვა ლოს-ანჯელესში, Maleficent: Mistress of Evil-ის გამოსვლასთან დაკავშირებულ პრესკონფერენციაზე.

კაბას შაილომ დაბალძირიანი შავი ფეხსაცმელი და ოქროსფერი საყურეები შეუხამა. მასთან ერთად კი საპრემიერო ხალიჩაზე ანჯელინას კიდევ ოთხი შვილი, 20 წლის მედოქსი, 16 წლის ზაჰარა და 13 წლის ტყუპი, ვივიენი და ნოქსი, გამოჩნდნენ.

დიდი ყურადღება მიიქცია ჯოლის ჩაცმულობამაც. მსახიობს Valentino-ის თეთრი პერანგი, შავი პიჯაკი და გრძელი შავი კაბა ეცვა.

ფოტო: Kawai Tang / WireImage

აღსანიშნავია, რომ ლოს-ანჯელესში მსახიობმა თავისი და თავისი შვილების გადაწყვეტილება გარემოსდაცვითი საკითხების გათვალისწინებით ახსნა. ანჯელინას თქმით, მათ ყველას ძველი, უკვე გამოყენებული სამოსი ეცვათ და არა ახალი, როგორც ეს მსგავს ღონისძიებებზეა მიღებული ხოლმე. ასე იგი ჭარბი მოხმარების, მათ შორის ტანსაცმლის, შემცირებას ცდილობს.

ფოტო: EMMA MCINTYRE/WIREIMAGE

რაც შეეხება Eternals, ოსკაროსანი ქლოა ჭაოს მიერ გადაღებული ფილმი განსაკუთრებული ძალების მქონე უკვდავი ხალხის ისტორიას მოგვითხრობს, რომელიც დედამიწაზე ათასობით წელია, საიდუმლოდ ცხოვრობს. ჯოლისთან ერთად, ფილმში ისეთ ვარსკვლავები მონაწილეობენ, როგორებიც არიან ჯემა ჩანი, რიჩარდ მადენი, სელმა ჰაიეკი, კიტ ჰარინგტონი და სხვები.

ასევე იხილეთ: