საოკუპაციო ხაზთან, ხურჩაში მოკლულ გიგა ოთხოზორიას დღეს, 26 მაისს, ზუგდიდში კრძალავენ. დაკრძალვაზე იმყოფებიან როგორც მისი ახლობლები, ისე ხელისუფლების, ოპოზიციის წარმომადგენლები და რიგითი მოქალაქეებიც.

ზუგდიდში იმყოფება ასევე ქვეყნის მთავარი პროკურორი, ირაკლი შოთაძე და სახელმწიფო მინისტრი შერიგების საკითხებში, პაატა ზაქარეიშვილიც.

როგორც შოთაძემ განმარტა, ოთხოზორიას მკვლელი ჯერ დაკავებული არ არის. მისი თქმით, ქართულმა მხარემ უკვე მიმართა ინტერპოლს ბრალდებულზე საერთაშორისო ძებნის გამოცხადების მიზნით.

ზაქარეიშვილმა კი განაცხადა, რომ მას გარკვეული წყაროებიდან აქვს ინფორმაცია იმის შესახებ, რომ ოთხოზორიას მკვლელი უკვე დაკავებულია, თუმცა ეს ინფორმაცია ჯერ დადასტურებული არ არის:

"ხვალ გალში ინციდენტების პრევენციისა და მათზე რეაგირების პირველი სამუშაო ჯგუფი შედგება, რომელიც პირდაპირ ამ თემას დაეთმობა. ხვალ ის ინფორმაცია, რაც მე დაუდასტურებელი მაქვს, მკაფიოდ გაირკვევა".

ჟურნალისტის შეკითხვას, მოითხოვს თუ არა ქურთული მხარე ოთხოზორიას მკვლელის ექსტრადირებას, ზაქარეიშვილმა უპასუხა, რომ ეს პოლიტიკური საკითხია და ამ საკითხს, სავარაუდოდ, ხვალ განიხილავენ.

გარდა ამისა, ზუგდიდში ხურჩაში მომხდარი მკვლელობა დღეს კიდევ ერთხელ, მშვიდობიანი მსვლელობით გააპროტესტეს. ადგილობრივი ხელისუფლების წარმომადგენლებმა, სტუდენტებთან ერთად, აფხაზებს მიმართეს და მშვიდობიანი თანაცხოვრებისკენ მოუწოდეს.

"ჩვენ კიდევ ერთხელ მივმართეთ აფხაზ და-ძმებს, რომ გიგა ოთხოზორია დღეიდან ყველა ჩვენგანის ტკივილია. ის არის აფხაზების ტკივილი, ქართველის ტკივილი. საქართველოს მომავალი ერთობაშია. აფხაზებმა, ქართველებმა - ჩვენ ერთად უნდა ვაშენოთ ჩვენი მომავალი, სხვა ალტერნატივა არ გაგვაჩნია ", - განაცხადა ზუგდიდის საკრებულოს თავდჯდომარემ, მერაბ ქავრაიამ.

19 მაისს საოკუპაციო ხაზთან, სოფელ ხურჩაში გიგა ოთხოზორია ე.წ. მესაზღვრემ ცეცხლსასროლი იარაღით მოკლა.