ამერიკელ კელი ენ ფერაროს თავის ქმართან, ენტონისთან, პირველ პაემანზე ხავერდის კაბა ეცვა, რათა უსინათლო კაცს "ეგრძნო, როგორ გამოიყურებოდა". სულ ცოტა ხნის წინ, როცა ისინი დაქორწინდნენ, კელი ენმა გადაწყვიტა, ბამბის ყვავილებითა და მაქმანებით მორთული და შეხებით აღსაქმელი კაბა ჩაეცვა, რათა ენტონის კიდევ ერთხელ ეგრძნო მისი ჩაცმულობა.

"მითქვამს კიდეც, რომ ამ სამყაროში ის ჩემი თვალებია. თუმცა, როცა საგანგებოდ ჩაიცვა კაბა, რომელსაც შეხებით ვიგრძნობდი, ეს ჩემთვის ძალიან ბევრს ნიშნავდა", — აღნიშნავს ენტონი ფერარო, პარაოლიმპიელი, მუსიკოსი და სამოტივაციო გამოსვლების ავტორი, — "მისი შეგრძნება შევძელი. ვიგრძენი, რომ მშვენიერი იყო".

წყვილმა ერთმანეთი 2018 წელს, მეგობრების შეკრებაზე გაიცნო. ენტონი ახალდაბრუნებული იყო ტოკიოში გავლილი ძიუდოს წვრთნიდან, კელი ენი კი ტაილანდიდან ჩამოსულიყო. ენტონის თქმით, მასთან კავშირი მაშინვე იგრძნო.

პირველი პაემანიც მნიშვნელოვან ამბავს დაემთხვა — ნიუ-იორკში ენტონის შესახებ გადაღებული დოკუმენტური ფილმის პრემიერა იყო. ფილმში მისი, როგორც სპორტსმენის, გავლილი გზის შესახებ ჰყვებოდნენ. ამის შემდეგ კელი ენმა მეტი ინფორმაციის მოძიება გადაწყვიტა უსინათლობისა და იმ ხალხის შესახებ, ვისაც, ენტონის მსგავსად, მცირედი სინათლის აღქმა შეუძლია.

ასე ისწავლა, რომ ბინაში წამახვილებული საგნები ბალიშებითა და ბუშტებიანი შესაფუთი ცელოფნით უნდა დაეფარა. მალევე გაიგო ისიც, რომ ენტონის ხავერდის და სხვა რბილი ქსოვილების შეხება მოსწონდა. ამიტომ, გადაწყვიტა, ბამბით ნაქარგი ყვავილებით გაწყობილი საქორწილო კაბა ხავერდით, შიფონითა და სირმით შეეკერა.

"ეკლესიაში სულ ჩავჩურჩულებდი, კაბას შეეხე-მეთქი. ძალიან მახარებდა, რომ ჩემსავით შეეძლო კაბა შეეგრძნო და მოსწონებოდა".

ენტონის თქმით, კელი ენმა და დედამისმა მარტო კაბა კი არა, ქორწილის ყველა დეტალი საგანგებოდ გათვალეს. ცერემონიამდე ქალმა მას ბრაილის შრიფტით დაწერილი წერილი გაუგზავნა, ქორწილი კი სპეციალურად გაიმართა დღის შუქზე, რადგან ენტონის სინათლისა და ჩრდილების აღქმა შეუძლია.

ცერემონია კარავში ჩატარდა, თუმცა, მეტალის ბოძები ბუშტებიანი შესაფუთი ცელოფნით დაფარეს, რათა ენტონი უსაფრთხოდ გადაადგილებულიყო.

"მისი წინდახედულობა და ძალისხმევა, რომელმაც ჩვენი ქორწილი ჩემზე მორგებულად აქცია, გამოუთქმელად ბევრს ნიშნავს. ის ჩემი საუკეთესო მეგობარია და, როგორც უკვე ვთქვი, 'ჩემი თვალები ამ სამყაროში'", — ამბობს ენტონი.

წყვილი სოციალურ ქსელებში უსინათლოთა შესახებ ცნობიერების ამაღლებას გეგმავს. მათ მოგზაურობაც ძალიან უყვართ — კელი ენი ხომ ენტონის ყოველთვის აღუწერს ნანახ ხედებს.

"ჩვენი ამბავი ბედნიერებისა და ერთიანობის იდეას სინათლით ავსებს, მათთვისაც კი, ვინც ჩემ მსგავსად ფიქრობდა, რომ სიყვარული შეუძლებელი იყო", — ამბობს ენტონი, — "სამყაროს მეტი სინათლე სჭირდება და, ვიმედოვნებ, ჩვენი ისტორია მას ცოტათი მაინც ჰფენს".